കോൺഗ്രസ് തദ്ദേശ തെരഞ്ഞെടുപ്പിനായി വൻ പ്രഖ്യാപനം നടത്തി. സംസ്ഥാനത്തെ 14 ജില്ലകളുടെ ചുമതല 14 നേതാക്കൾക്ക് വീതിച്ചു നൽകി. മുനിസിപ്പൽ കോർപ്പറേഷനുകളുടെ മേൽനോട്ടം മുതിർന്ന നേതാക്കൾക്ക് നൽകി. മൂന്ന് വർക്കിംഗ് പ്രസിഡന്റുമാർക്ക് സംസ്ഥാനത്തെ മൂന്ന് മേഖലകളായി തിരിച്ച് ചുമതലകൾ വിഭജിച്ചു.
മുനിസിപ്പൽ കോർപ്പറേഷനുകളുടെ ചുമതല പ്രമുഖ നേതാക്കൾക്ക് നൽകി. കണ്ണൂർ കെ സുധാകരനും, കോഴിക്കോട് രമേശ് ചെന്നിത്തലയ്ക്കും, തൃശ്ശൂർ റോജി എം ജോണിനും, കൊച്ചി വിഡി സതീശനും, കൊല്ലം വിഎസ് ശിവകുമാറിനും, തിരുവനന്തപുരം പിസി വിഷ്ണുനാഥിനും നൽകി. വർക്കിംഗ് പ്രസിഡന്റുമാരായ ടി സിദ്ധിഖിന് വടക്കൻ മേഖലയും, ടിഎൻ പ്രതാപന് മധ്യ മേഖലയും, കൊടിക്കുന്നിൽ സുരേഷിന് ദക്ഷിണ മേഖലയും നൽകി.
തദ്ദേശഭരണ തെരഞ്ഞെടുപ്പിൽ വൻ വിജയം നേടാൻ കഠിനപ്രയത്നം വേണമെന്ന ഹൈക്കമാൻഡ് നിർദ്ദേശം അടിസ്ഥാനമാക്കിയാണ് ഈ നീക്കം. വിഭാഗീയ പ്രവർത്തനങ്ങൾ ഒരു കാരണവശാലും അനുവദിക്കില്ലെന്ന് ഹൈക്കമാൻഡ് കർശനമായി നിർദേശിച്ചു. എഐസിസി ജനറൽ സെക്രട്ടറി കെസി വേണുഗോപാൽ പങ്കെടുത്ത വയനാട്ടിലെ പ്രത്യേക ക്യാമ്പിലാണ് ഈ തീരുമാനങ്ങൾ കൈക്കൊണ്ടത്.
