എറണാകുളം ചെങ്ങമനാട്ടിലെ പതിനാലുവയസുകാരന്റെ ആത്മഹത്യ സംഭവത്തിൽ ആലുവ ഡിവൈഎസ്പിയുടെ മേൽനോട്ടത്തിൽ അന്വേഷണം നടക്കും. ഓൺലൈൻ ഗെയിമാണ് കുട്ടിയുടെ ജീവനെടുത്തതെന്ന സംശയത്തിന്റെ അടിസ്ഥാനത്തിൽ, കുട്ടി ഉപയോഗിച്ചിരുന്ന മൊബൈൽ ഫോണുകളും മറ്റ് ഇലക്ട്രോണിക് ഉപകരണങ്ങളും പരിശോധിക്കാനാണ് നിലവിൽ നിർദേശം നൽകിയിരിക്കുന്നത്.
കുട്ടി ഓൺലൈൻ ഗെയിമിന് അടിമപ്പെട്ടിട്ടുണ്ടെന്നാണ് പൊലീസിന്റെ സംശയം. ചെങ്ങമനാട് കപ്രശ്ശേരി വടക്കുഞ്ചേരി വീട്ടിൽ ജെയ്മിയുടെ മകൻ ആഗ്നൽ (14) ആണ് മരിച്ചത്. വെള്ളിയാഴ്ച വൈകിട്ട് സ്കൂളിൽ നിന്ന് വീട്ടിലെത്തി ഭക്ഷണം കഴിഞ്ഞ് മുറിയിലേക്ക് പോയ ശേഷമായിരുന്നു സംഭവം. വാതിൽ തുറക്കാതായതോടെ ചവിട്ടി തുറന്നപ്പോഴാണ് കുട്ടിയെ ഫാനിൽ തൂങ്ങിയ നിലയിൽ കണ്ടെത്തിയത്.
14 വയസുകാരൻ ആഗ്നൽ ജെയിംസിന്റെ മരണത്തിലേക്ക് നയിച്ചത് ഓൺലൈൻ ഗെയിമായിരിക്കാമെന്ന് ബന്ധുക്കളും പൊലീസിനോട് പറഞ്ഞിരുന്നു. ഉടനെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. ഈ സംഭവത്തിൽ കൂടുതൽ വിവരങ്ങൾ ലഭിക്കുന്നതിനായി പൊലീസ് അന്വേഷണം തുടരുകയാണ്.
