മധ്യപ്രദേശിലെ ഗ്വാളിയോറിൽ ഒരു യുവാവ് തന്റെ കറുത്ത നിറം കാരണം ഭാര്യ ഉപേക്ഷിച്ചുവെന്ന പരാതിയുമായി പൊലീസിനെ സമീപിച്ചു. 24 വയസ്സുള്ള ഈ യുവാവ് വിക്കി ഫാക്ടറി ഏരിയയിലെ താമസക്കാരനാണ്. 14 മാസം മുമ്പ് വിവാഹിതനായ ഇദ്ദേഹം, തന്റെ നിറം കറുപ്പായതിനാൽ വിവാഹം കഴിഞ്ഞയുടൻ ഭാര്യ ശല്യപ്പെടുത്താൻ തുടങ്ങിയെന്ന് ആരോപിച്ചു.
ഒരു മാസം മുമ്പ് ദമ്പതികൾക്ക് കുഞ്ഞുണ്ടായി. എന്നാൽ പ്രസവം കഴിഞ്ഞ് പത്താം ദിവസം യുവതി മകളെയും ഭർത്താവിനെയും ഉപേക്ഷിച്ച് സ്വന്തം മാതാപിതാക്കൾക്കൊപ്പം താമസിക്കാൻ പോയി. ഭാര്യയെ തിരികെ കൊണ്ടുവരാൻ യുവാവ് ശ്രമിച്ചെങ്കിലും അവർ തന്റെ കറുത്ത നിറത്തെ ചൊല്ലി വരാൻ തയ്യാറായില്ലെന്നാണ് പരാതി.
പിന്നീട് യുവതി പൊലീസിൽ ഭർത്താവിനെതിരെ പീഡന പരാതി നൽകി. എന്നാൽ അന്വേഷണത്തിൽ ദിവസങ്ങൾ മാത്രം പ്രായമുള്ള കുഞ്ഞിനെ ഉപേക്ഷിച്ചാണ് യുവതി പോയതെന്ന് വ്യക്തമായി. തുടർന്ന് ഭർത്താവും യുവതിക്കെതിരെ പരാതി നൽകി. സംഭവത്തിൽ കേസെടുക്കാതെ പൊലീസ് ഇരുവരെയും കൗൺസിലിങിനായി വിളിപ്പിച്ചിട്ടുണ്ട്.
