കേരള സർക്കാർ വീണ്ടും കേരളീയം സംഘടിപ്പിക്കാൻ ഒരുങ്ങുകയാണ്. ഇതിനായി മുഖ്യമന്ത്രിയുടെ അധ്യക്ഷതയിൽ സംഘാടകസമിതി യോഗം ചേർന്നു. ഈ വർഷം ഡിസംബറിൽ കേരളീയം നടത്താനാണ് ആലോചന. ബജറ്റിൽ പ്രഖ്യാപിച്ചതുപോലെ കേരളീയം തുടരുമെന്നും ഇതിനായി 10 കോടി രൂപ നീക്കിവെച്ചിട്ടുണ്ടെന്നും അറിയിച്ചു.
കഴിഞ്ഞ വർഷം നവംബർ ഒന്നു മുതൽ ഏഴു വരെ തിരുവനന്തപുരത്ത് നടന്ന കേരളീയത്തിൽ വിവിധ കലാ-സാംസ്കാരിക പരിപാടികൾ സംഘടിപ്പിച്ചിരുന്നു. ഏഴ് ദിവസങ്ങളിലായി തെരുവു വേദികൾ അടക്കം 44 ഇടങ്ങളിലാണ് പരിപാടികൾ നടന്നത്. കലാ-സാംസ്കാരിക പരിപാടികൾ, ഭക്ഷ്യമേളകൾ, സെമിനാറുകൾ, പ്രദർശനങ്ങൾ തുടങ്ങി നിരവധി പരിപാടികൾ സർക്കാർ ഒരുക്കിയിരുന്നു.
ഇനി മുതൽ എല്ലാ വർഷവും കേരളീയം നടത്തുമെന്നും തിരുവനന്തപുരമായിരിക്കും സ്ഥിരം വേദിയെന്നും മുഖ്യമന്ത്രി കഴിഞ്ഞ വർഷത്തെ സമാപന വേദിയിൽ പ്രഖ്യാപിച്ചിരുന്നു. കഴിഞ്ഞ തവണ തദ്ദേശസ്ഥാപനങ്ങളിൽ നിന്നും സഹകരണ സ്ഥാപനങ്ങളിൽ നിന്നുമാണ് ഫണ്ട് കണ്ടെത്തിയത്. ഇത്തവണ തുക സ്പോൺസർഷിപ്പിലൂടെ കണ്ടെത്തണമെന്ന നിർദേശവും നൽകിയിട്ടുണ്ട്.
