സിപിഐഎം സംസ്ഥാന സെക്രട്ടറി എം.വി ഗോവിന്ദൻ ആലപ്പുഴ ജില്ലാ കമ്മിറ്റി യോഗത്തിൽ പാർട്ടിയിലെ ‘കളകൾ’ പറിക്കുമെന്ന് മുന്നറിയിപ്പ് നൽകി. പുന്നപ്ര വയലാറിന്റെ മണ്ണിലുള്ള ഈ ‘കളകൾ’ ആരായാലും ഒഴിവാക്കുമെന്നും, അതിന്റെ പേരിൽ എന്ത് നഷ്ടം ഉണ്ടായാലും പ്രശ്നമില്ലെന്നും അദ്ദേഹം വ്യക്തമാക്കി. പാർട്ടിക്ക് മുന്നോട്ട് പോകാൻ ഇത് അനിവാര്യമാണെന്നും ഗോവിന്ദൻ പറഞ്ഞു.
കായംകുളത്ത് സംഘടനാ നടപടി എടുക്കാതെ മുന്നോട്ടു പോകാനാവില്ലെന്ന് ഗോവിന്ദൻ അഭിപ്രായപ്പെട്ടു. ചില ഏരിയകളിലും ലോക്കൽ കമ്മിറ്റികളിലും ചിലർ സ്വന്തം ഇഷ്ടം അനുസരിച്ച് പ്രവർത്തിക്കുന്നുവെന്നും, അത്തരക്കാരെ ഇനി വെച്ചു പൊറുപ്പിക്കില്ലെന്നും അദ്ദേഹം മുന്നറിയിപ്പ് നൽകി. പിഎസ്‌സി ആരോപണത്തിൽ പാർട്ടിയും സർക്കാരും വേണ്ട നടപടി എടുക്കുമെന്നും, പണം വാങ്ങി പിഎസ്‌സി അംഗങ്ങളെ നിയമിക്കുന്ന രീതി സിപിഐഎമ്മിന് ഇല്ലെന്നും ഗോവിന്ദൻ വ്യക്തമാക്കി.
മുഹമ്മദ് റിയാസിനെതിരായ ആരോപണം റിയാസ് തന്നെ നിഷേധിച്ചതായി ഗോവിന്ദൻ പറഞ്ഞു. ആർക്കെതിരെയും ആരോപണം ഉന്നയിക്കാമെന്നും, തെറ്റായ പ്രവണത വെച്ചുപുലർത്തില്ലെന്നും അദ്ദേഹം കൂട്ടിച്ചേർത്തു. പരാതി ഉണ്ടെങ്കിൽ പൊലീസ് അന്വേഷണം ഉൾപ്പടെ ഏത് അന്വേഷണവും നടത്താമെന്നും എം.വി ഗോവിന്ദൻ വ്യക്തമാക്കി.
