കാപ്പാ കേസ് പ്രതിയായ ശരൺ ചന്ദ്രനെ സിപിഐഎം സ്വീകരിച്ച സംഭവത്തിൽ വിവാദം പുകയുകയാണ്. ബിജെപി സംസ്ഥാന അധ്യക്ഷൻ കെ സുരേന്ദ്രൻ സിപിഐഎമ്മിനെ രൂക്ഷമായി വിമർശിച്ചു. തെറ്റുചെയ്തതിന് ബിജെപി മാറ്റി നിർത്തിയയാളെയാണ് സിപിഐഎം മാലയിട്ട് സ്വീകരിച്ചതെന്ന് സുരേന്ദ്രൻ ആരോപിച്ചു. ഹരിശ്ചന്ദ്രനെ സ്വീകരിക്കുന്നപോലെയാണ് സിപിഐഎം സ്വീകരിച്ചതെന്നും കൊടും ക്രിമിനലുകളെയാണ് സിപിഐഎം ഇപ്പോഴും സ്വീകരിക്കുന്നതെന്നും അദ്ദേഹം കുറ്റപ്പെടുത്തി.
സിപിഐഎം പത്തനംതിട്ട ജില്ലാ സെക്രട്ടറി കെപി ഉദയഭാനുവിന്റെ വാദത്തെ തള്ളി പത്തനംതിട്ട ജില്ലാ പൊലീസ് മേധാവി രംഗത്തെത്തി. ശരൺ ചന്ദ്രന്റെ കാപ്പാ കാലാവധി കഴിഞ്ഞതാണെന്ന ഉദയഭാനുവിന്റെ വാദം തെറ്റാണെന്ന് പൊലീസ് മേധാവി വ്യക്തമാക്കി. ശരൺ ചന്ദ്രൻ ഇപ്പോഴും കാപ്പാ കേസ് പ്രതി തന്നെയാണെന്നും കാപ്പാ കേസ് നിലവിലുണ്ടെന്നും അദ്ദേഹം സ്ഥിരീകരിച്ചു.
ഈ സംഭവത്തിൽ വിശദീകരണവുമായി മന്ത്രി വീണാ ജോർജ് രംഗത്തെത്തി. ആയിരക്കണക്കിന് ആളുകളാണ് പാർട്ടിയിലേക്ക് വരുന്നതെന്നും പത്തനംതിട്ടയിൽ കാപ്പാ പ്രതി പാർട്ടിയിലേക്ക് വന്നത് ഏരിയ കമ്മിറ്റി സംഘടിപ്പിച്ച പരിപാടിയിലാണെന്നും അവർ വ്യക്തമാക്കി. ബിജെപിയിലും ആർഎസ്എസിലും പ്രവർത്തിച്ചവരാണ് പാർട്ടിയിലേക്ക് വന്നതെന്നും മുമ്പ് തെറ്റായ രാഷ്ട്രീയവും രീതികളും പിന്തുടർന്നവർ അത് ഉപേക്ഷിച്ചുകൊണ്ടാണ് പാർട്ടിയിലേക്ക് വന്നതെന്നും മന്ത്രി പറഞ്ഞു. ഒരു ആശങ്കക്കും അടിസ്ഥാനമില്ലെന്നും അവർ കൂട്ടിച്ചേർത്തു.
