CPI seeks clarity on PM Shri scheme, approaches Chief Secretary

◾പി.എം. ശ്രീ പദ്ധതിയിൽ സംസ്ഥാന സർക്കാർ ഒപ്പുവെച്ചതുമായി ബന്ധപ്പെട്ട് സി.പി.ഐയും സർക്കാരും തമ്മിൽ ഭിന്നത നിലനിൽക്കുന്ന സാഹചര്യത്തിൽ, വിഷയത്തിൽ വ്യക്തത തേടാൻ സി.പി.ഐ തീരുമാനിച്ചു. ഇതുമായി ബന്ധപ്പെട്ട് ചീഫ് സെക്രട്ടറിയുമായി ധാരണാപത്രം ഒപ്പിട്ടോ എന്ന് മന്ത്രി കെ. രാജൻ ആരായും. സംസ്ഥാന സെക്രട്ടറിയേറ്റിന് മുന്നോടിയായിട്ടാണ് ഈ വിവരശേഖരണം നടത്തുന്നത്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

സി.പി.ഐയുടെ എതിർപ്പ് മറികടന്ന് പി.എം. ശ്രീ പദ്ധതിയിൽ ചേരാൻ സർക്കാർ തീരുമാനിച്ചതാണ് എൽ.ഡി.എഫിൽ തർക്കത്തിന് ഇടയാക്കിയത്. ഈ വിഷയത്തിൽ സി.പി.ഐയും സി.പി.ഐ.എമ്മും തമ്മിൽ പരസ്യമായ വാദപ്രതിവാദങ്ങൾ നടന്നു. കേന്ദ്രസർക്കാരിൽ നിന്ന് 1466 കോടി രൂപ ലഭിക്കാനുണ്ട്, അത് നഷ്ടപ്പെടുത്തുന്നത് എന്തിനെന്നായിരുന്നു വിദ്യാഭ്യാസ മന്ത്രിയുടെ പ്രതികരണം.

പി.എം. ശ്രീയിൽ ചേരാനുള്ള സർക്കാരിന്റെ നീക്കം നയപരമായ മാറ്റമാണെന്ന് സി.പി.ഐ വിലയിരുത്തിയിരുന്നു. കേന്ദ്ര സർക്കാർ ഫണ്ട് എല്ലാവർക്കും അവകാശപ്പെട്ടതാണെന്നും സി.പി.ഐ നേതാക്കൾ അഭിപ്രായപ്പെട്ടു. എന്നാൽ പാർട്ടിയുടെ എതിർപ്പ് അവഗണിച്ച് കേന്ദ്ര വിദ്യാഭ്യാസ പദ്ധതിയായ പി.എം. ശ്രീയിൽ ഒപ്പുവെച്ചതോടെ സി.പി.ഐ കടുത്ത അതൃപ്തിയിലാണ്.

ഇടതുപക്ഷ നയങ്ങളിൽ നിന്ന് സി.പി.ഐ.എം വ്യതിചലിച്ചെന്ന് സി.പി.ഐ ആരോപിച്ചു. ഇടതുനയം ഉയർത്തിപ്പിടിക്കേണ്ടത് സി.പി.ഐയുടെ മാത്രം ബാധ്യതയല്ലെന്നും നേതാക്കൾ വിമർശിച്ചു. ഈ സാഹചര്യത്തിൽ വിഷയം ചർച്ച ചെയ്യാൻ ഇന്ന് ദേശീയ-സംസ്ഥാന സെക്രട്ടേറിയറ്റുകളുടെ അടിയന്തര യോഗം ചേരും.

പാർട്ടി മന്ത്രിമാരെ ഔദ്യോഗികമായി അറിയിക്കാത്ത സാഹചര്യത്തിലാണ് ചീഫ് സെക്രട്ടറിയോട് വിവരം തേടുന്നത്. വിയോജിപ്പ് കേന്ദ്ര നേതൃത്വത്തെ അറിയിച്ചതായും റിപ്പോർട്ടുകളുണ്ട്.

ഇതിനിടെ പി.എം. ശ്രീയെ ചൊല്ലി എൽ.ഡി.എഫിൽ തർക്കം ഉടലെടുത്തിട്ടുണ്ട്. സി.പി.ഐയും സി.പി.ഐ.എം നേതാക്കളും പരസ്യമായി രംഗത്തെത്തിയിരുന്നു.

Story Highlights : PM SHRI ; K Rajan to meet Chief Secretary

Story Highlights: പി.എം. ശ്രീ പദ്ധതിയിൽ സർക്കാർ ഒപ്പുവെച്ചതുമായി ബന്ധപ്പെട്ട് സി.പി.ഐയും സർക്കാരും തമ്മിൽ ഭിന്നത നിലനിൽക്കുന്ന സാഹചര്യത്തിൽ, വിഷയത്തിൽ വ്യക്തത തേടാൻ സി.പി.ഐ തീരുമാനിച്ചു.

പി.എം. ശ്രീ: ധാരണാപത്രം ഒപ്പിട്ടതിൽ സി.പി.ഐക്ക് കടുത്ത അതൃപ്തി; അടിയന്തര യോഗം ചേർന്ന് തുടർനടപടികൾ ആലോചിക്കുന്നു