M Vincent Criticizes Ganesh Kumar's Conduct in KSRTC Inspections

തിരുവനന്തപുരം◾: കെഎസ്ആർടിസി ബസ്സുകളിൽ ഗതാഗത വകുപ്പ് മന്ത്രി കെ.ബി. ഗണേഷ് കുമാർ നടത്തുന്ന മിന്നൽ പരിശോധനകൾക്കെതിരെ വിമർശനവുമായി എം. വിൻസെന്റ് എംഎൽഎ രംഗത്ത്. മന്ത്രിയുടെ ധാർഷ്ട്യം നിറഞ്ഞ നടപടികൾക്കുള്ള തിരിച്ചടിയാണ് ഹൈക്കോടതിയുടെ ഭാഗത്ത് നിന്നും ഉണ്ടായതെന്നും അദ്ദേഹം കൂട്ടിച്ചേർത്തു. കുപ്പിവെള്ളത്തിന്റെ ബോട്ടിൽ ഡ്രൈവർ സീറ്റിന് അടുത്ത് വെച്ചതിന് ഡ്രൈവറെ സ്ഥലം മാറ്റിയ മന്ത്രിയുടെ നടപടി ഹൈക്കോടതി റദ്ദാക്കിയിരുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഗണേഷ് കുമാർ ഒരു അഡ്മിനിസ്ട്രേറ്റർ എന്ന നിലയിൽ പൂർണ്ണമായി പരാജയപ്പെട്ടുവെന്ന് എം. വിൻസെന്റ് കുറ്റപ്പെടുത്തി. മന്ത്രി സ്വേച്ഛാധിപത്യ രീതിയിൽ എന്തും ചെയ്യാനുള്ള ഇടമല്ല ഇതെന്നും അദ്ദേഹം പറഞ്ഞു. മന്ത്രി മാധ്യമങ്ങളെ കൂട്ടി കൊണ്ടുപോയി ഇങ്ങനെയൊക്കെ ചെയ്യുന്നത് സിനിമയ്ക്കും നാടകത്തിനും നല്ലതായിരിക്കുമെന്നും വിൻസെന്റ് പരിഹസിച്ചു. മന്ത്രിയുടെ നിലവാരം കുറഞ്ഞ നാടകമാണ് ഇതെന്നും അദ്ദേഹം ആരോപിച്ചു.

കോൺഗ്രസ് യൂണിയൻ പണം ചിലവാക്കി കോടതിയിൽ പോയി വിധി വാങ്ങിച്ചു എന്നാണ് മന്ത്രി ഇതിനോട് പ്രതികരിച്ചത്. എന്നാൽ കോടതി വിധി വന്നപ്പോൾ കോൺഗ്രസ് യൂണിയനെ അധിക്ഷേപിക്കുന്നത് കോടതിയെ അധിക്ഷേപിക്കുന്നതിന് തുല്യമാണെന്നും എം. വിൻസെന്റ് അഭിപ്രായപ്പെട്ടു. മന്ത്രിയുടെ ഇത്തരം ഭ്രാന്തൻ നയങ്ങളെ ഒരുതരത്തിലും ന്യായീകരിക്കാൻ കഴിയില്ല. കെ.ബി. ഗണേഷ് കുമാർ എന്നാൽ കിടന്ന് ബഹളം വയ്ക്കുന്ന ഗണേഷ് കുമാർ എന്ന് മാത്രമേ വ്യാഖ്യാനിക്കാൻ കഴിയൂ എന്നും അദ്ദേഹം കൂട്ടിച്ചേർത്തു.

ജമാഅത്തിനെതിരായ വിമർശനം മാർക്സിസ്റ്റ് ദാസ്യവേലയാക്കരുത്: നാസർ ഫൈസി

അടിമകളോട് പെരുമാറുന്നത് പോലെയാണ് മന്ത്രി ജീവനക്കാരോട് പെരുമാറുന്നത്. എംഡിഎംഎ കണ്ടതുകൊണ്ട് വന്ന രീതിയിലാണ് ജീവനക്കാരോട് മന്ത്രി പെരുമാറിയതെന്നും വിൻസെന്റ് ആരോപിച്ചു. ജീവനക്കാരോട് ഇത്തരത്തിൽ മോശമായി പെരുമാറിയ മന്ത്രി മാപ്പ് പറയണമെന്നും അദ്ദേഹം ആവശ്യപ്പെട്ടു. മന്ത്രിയുടെ മുന്നിലേക്ക് ഇത്രയും വേഗത്തിൽ ബസ് ഓടിച്ചു വരുന്നതിന് കാരണം ഇൻ എഫക്റ്റീവ് ആയ വകുപ്പാണ്.

മന്ത്രി മറ്റുള്ളവരെ അധിക്ഷേപിക്കുന്നത് ഒരു ശീലമാക്കി മാറ്റിയെന്നും എം. വിൻസെന്റ് ആരോപിച്ചു. അദ്ദേഹത്തെ നിയന്ത്രിക്കാൻ മുഖ്യമന്ത്രി തയ്യാറാകണമെന്നും അദ്ദേഹം ആവശ്യപ്പെട്ടു. പല ഡിപ്പോകളുടെയും അവസ്ഥ വളരെ ശോചനീയമാണ്, എന്നാൽ ഇതൊന്നും മന്ത്രി കാണുന്നില്ല. ഒരു പ്ലാസ്റ്റിക് ബോട്ടിൽ കണ്ടതിന് വലിയ കോലാഹലം ഉണ്ടാക്കുന്നുവെന്നും അദ്ദേഹം വിമർശിച്ചു.

അതേസമയം, ഇന്ന് വയനാട് ജില്ലയിൽ ഡീസൽ ഇല്ലാത്തത് മൂലം 5 ഷെഡ്യൂളുകൾ മുടങ്ങി. പാപ്പനംകോട് സെൻട്രൽ വർക്സ് അടക്കം വൃത്തിഹീനമായ അവസ്ഥയിലാണ്. മന്ത്രി ഡിപ്പോകൾ വൃത്തിയാക്കാനുള്ള നടപടി സ്വീകരിക്കണമെന്നും എം. വിൻസെന്റ് ആവശ്യപ്പെട്ടു. ജീവനക്കാരുടെ മേൽ ആഴ്ചയിൽ ഒരിക്കൽ മെക്കിട്ട് കയറി വാർത്തകളിൽ ഇടം നേടാനുള്ള ശ്രമം മാത്രമാണ് മന്ത്രി നടത്തുന്നത്.

പുതിയ ബസുകളുടെ ചക്രങ്ങൾ വരെ ഊരി തെറിച്ചു പോവുന്ന സംഭവങ്ങൾ ഉണ്ടാകുന്നുണ്ട്. മന്ത്രി വിഡ്ഢികളുടെ സ്വർഗ്ഗത്തിലാണ് കൊട്ടാരം പണിത് ജീവിക്കുന്നതെന്നും വിൻസെന്റ് പരിഹസിച്ചു. യൂണിയനുകളുടെയും ജീവനക്കാരുടെയും മെക്കിട്ട് കയറാനാണ് ഉദ്ദേശമെങ്കിൽ മന്ത്രിക്കെതിരെ നിയമനടപടി സ്വീകരിക്കുമെന്നും എം. വിൻസെന്റ് കൂട്ടിച്ചേർത്തു. ജീവനക്കാരുടെ നെഞ്ചത്ത് കയറുന്ന നടപടി മന്ത്രി അവസാനിപ്പിക്കണമെന്നും അദ്ദേഹം ആവശ്യപ്പെട്ടു.

നടിയെ ആക്രമിച്ച കേസ്: കൊച്ചിയിലെ കോടതി ഇന്ന് വീണ്ടും പരിഗണിക്കും

Story Highlights : m vincent against k b ganeshkumar

പിഎം ശ്രീ പദ്ധതിയിൽ കേരളത്തിന് പാലമായത് ജോൺ ബ്രിട്ടാസ്; കേന്ദ്രമന്ത്രിയുടെ പ്രസ്താവനയിൽ രാഷ്ട്രീയ കോളിളക്കം