ഗുരുവായൂർ കുന്നത്തുമന ഹെറിറ്റേജ് റിസോർട്ടിൽ ഇന്ന് രാവിലെ 11 നും 12 നും ഇടയിലുള്ള മുഹൂർത്തത്തിൽ അവർ വിവാഹിതരായി. തൃശൂർ വാടാനപ്പിള്ളി സ്വദേശിയുടെ നായ ആക്സിഡാണ് വരൻ. പുന്നയൂർക്കുളത്തുകാരി ജാൻവിയായിരുന്നു വധു.
കോവിഡ് മാനദണ്ഡങ്ങൾ പാലിച്ചാണ് വിവാഹം നടന്നത്. പൂക്കൾകൊണ്ട് അലങ്കരിച്ച കതിർമണ്ഡപത്തിൽ പരസ്പരം മാലയണിയിച്ച് കന്നിമാസത്തിൽ വിവാഹം നടന്നു. വിവാഹത്തിനുശേഷം ആക്സിഡിന്റെ വീട്ടിലേക്കാണ് ഇരുവരും പോകുക.
കോവിഡ് മാനദണ്ഡങ്ങൾ പാലിച്ച് അമ്പത് പേർക്കാണ് വിവാഹത്തിന് ക്ഷണം ലഭിച്ചത്. ഇരുവരുടെയും പ്രിയ ഭക്ഷണമായ ചിക്കൻ ഫ്രൈയും ബിരിയാണിയും ഉൾപ്പെടെ ഗംഭീരമായാണ് കല്യാണം നടത്തിയത്.
കന്നി മാസം അടുത്തതോടെയാണ് തങ്ങളുടെ ആക്സിഡിന് വിവാഹ പ്രായമായെന്ന് ഷെല്ലിക്കും ഭാര്യ നിഷയ്ക്കും തോന്നിയത്. തുടർന്ന് ഇരുവരും ആക്സിഡിന് വധുവിനെ അന്വേഷിച്ചിറങ്ങി. പുന്നയൂർകുളത്തെ വീട്ടിൽ വച്ച് ജാൻവിയെ കണ്ടതോടെ ഒറ്റനോട്ടത്തിൽ ആക്സിഡിന് ഇഷ്ടമായി.
ഇതോടെ ഇരുവരുടെയും വിവാഹം നടത്താൻ തീരുമാനിക്കുകയായിരുന്നു. ഇതിനോടകം ഇരുവരുടെയും സേവ് ദ ഡേറ്റ് വീഡിയോ സമൂഹമാധ്യമങ്ങളിൽ വൈറലായിരുന്നു.
Story Highlights: Viral Dog marriage in kerala.
