നിപ വൈറസ് ബാധ റിപ്പോര്‍ട്ട് ചെയ്ത സാഹചര്യത്തിൽ കേരളത്തിന് നാലിന നിർദേശം നൽകി കേന്ദ്രം. നിപ ബാധിച്ച് മരണപ്പെട്ട കുട്ടിയുടെ ബന്ധുക്കളെ ഉടൻതന്നെ പരിശോധനയ്ക്കു വിധേയമാക്കണമെന്ന് നിര്‍ദേശത്തില്‍ പറയുന്നു.
കഴിഞ്ഞ 12 ദിവസത്തെ സമ്പർക്ക പട്ടിക തയാറാക്കാനും കേരളത്തിനു കേന്ദ്രം നിര്‍ദേശം നല്‍കി. പരമാവധി വേഗത്തില്‍ ക്വാറന്‍റൈനും ഐസൊലേഷനും ഉറപ്പാക്കണം, എത്രയും വേഗം സ്രവങ്ങൾ പരിശോധന നടത്തണം തുടങ്ങിയവയാണ് മറ്റ് നിര്‍ദേശങ്ങള്‍.
കേരളത്തില്‍ നിപ മരണം റിപ്പോര്‍ട്ട് ചെയ്ത പശ്ചാത്തലത്തില്‍ കേന്ദ്രസംഘം ഉടന്‍തന്നെ കേരളത്തിലെത്തുമെന്ന് അറിയിച്ചു. കേന്ദ്രസംഘം കേരളത്തിലെത്തുന്നത് കോഴിക്കോട്ടെ സാഹചര്യം വിലയിരുത്താനാണ്. സെന്‍റർ ഫോർ ഡിസീസ് കൺട്രോൾ സംഘമാണ് സംസ്ഥാനത്ത് എത്തുന്നത്. കേന്ദ്ര ആരോഗ്യ മന്ത്രാലയം കേരളത്തിന് എല്ലാ വിധ സഹായവും നൽകുമെന്ന് അറിയിച്ചിട്ടുണ്ട്.
അതേസമയം, രോഗം പിടിപ്പെട്ട് മരണപ്പെട്ട കുട്ടിയുമായി സമ്പർക്കമുള്ള 4 പേർക്ക് രോഗലക്ഷണങ്ങളില്ലെന്നാണ് റിപ്പോര്‍ട്ട്. സമ്പർക്ക പട്ടികയിലുള്ള ബാക്കി 17 പേരെ പരിശോധിക്കും. 24 മണിക്കൂറും ഏകോപനത്തിനായി പ്രവർത്തിക്കുന്ന കൺട്രോൾ റൂം തുറക്കുമെന്നും സംസ്ഥാന ആരോഗ്യവകുപ്പ് വ്യക്തമാക്കി.
Story highlight : instructions of Central government to Kerala for control Nipah.
