Protests intensify against Registrar's suspension in Kerala University

തിരുവനന്തപുരം◾: കേരള സർവകലാശാലയിലെ ഭാരതാംബ വിവാദത്തിൽ രജിസ്ട്രാർക്കെതിരെ വിസി സ്വീകരിച്ച സസ്പെൻഷൻ നടപടിയിൽ പ്രതിഷേധം ശക്തമാകുന്നു. ഇതിനെതിരെ നിയമപരമായി മുന്നോട്ട് പോകുമെന്ന് രജിസ്ട്രാർ ഡോ. കെ.എസ്. അനിൽകുമാർ അറിയിച്ചു. എസ്എഫ്ഐ ഇന്ന് വൈകുന്നേരം രാജ്ഭവനിലേക്ക് മാർച്ച് നടത്തും. ഇടത് സിൻഡിക്കേറ്റ് അംഗങ്ങൾ വിസിയുടെ നടപടി തള്ളിക്കളഞ്ഞു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

രജിസ്ട്രാർക്കെതിരെ നടപടിയെടുക്കാൻ വി.സിക്ക് അധികാരമില്ലെന്നും ഇടത് സിൻഡിക്കേറ്റ് അംഗങ്ങൾ ചൂണ്ടിക്കാട്ടി. ഡെപ്യൂട്ടി രജിസ്ട്രാർക്ക് മുകളിലുള്ളവർക്കെതിരെ നടപടിയെടുക്കാൻ സിൻഡിക്കേറ്റിന് മാത്രമേ അധികാരമുള്ളൂവെന്നും അവർ കൂട്ടിച്ചേർത്തു. സർവകലാശാല ചവറ്റുകൊട്ടയിൽ വിസിയുടെ നടപടി ഇടുമെന്നും അച്ചടക്കനടപടി സ്വീകരിക്കാൻ വിസിക്ക് അധികാരമില്ലെന്നും ഇടത് സിൻഡിക്കേറ്റ് അംഗങ്ങൾ വ്യക്തമാക്കി. രജിസ്ട്രാർ കെ.എസ്. അനിൽകുമാർ നാളെയും ഓഫീസിൽ എത്തുമെന്നും അറിയിച്ചിട്ടുണ്ട്.

ഗവർണറെ താൻ അപമാനിച്ചിട്ടില്ലെന്ന് രജിസ്ട്രാർ ഡോ. കെ.എസ്. അനിൽകുമാർ ട്വന്റി ഫോറിനോട് പറഞ്ഞു. ഗവർണർ വേദിയിലിരിക്കുമ്പോൾ അല്ല പരിപാടി റദ്ദാക്കിയ വിവരം അറിയിച്ചത്. അതിന് മുൻപ് തന്നെ അറിയിപ്പ് നൽകിയിരുന്നു. തനിക്കെതിരെ സ്വീകരിക്കുന്ന കാര്യങ്ങളിൽ പറയുന്നതൊന്നും ശരിയല്ലെന്നും അദ്ദേഹം കൂട്ടിച്ചേർത്തു.

കഴിഞ്ഞ ദിവസം കേരള സർവകലാശാല സെനറ്റ് ഹാളിൽ ശ്രീ പത്മനാഭ സേവാസമിതി സംഘടിപ്പിച്ച പുസ്തക പ്രകാശന ചടങ്ങിൽ കാവിക്കൊടിയേന്തിയ ഭാരതാംബയുടെ ചിത്രം വെച്ചത് വിവാദമായിരുന്നു. ഈ സംഭവം സെക്യൂരിറ്റി ഓഫീസറും പിആർഒയും രജിസ്ട്രാറുടെ ശ്രദ്ധയിൽപ്പെടുത്തിയിരുന്നു. ഇതിന്റെ അടിസ്ഥാനത്തിൽ, സെനറ്റ് ഹാളിലെത്തിയ രജിസ്ട്രാർ ചിത്രം എടുത്തുമാറ്റണമെന്നും അല്ലെങ്കിൽ പരിപാടി നടത്താൻ അനുവദിക്കില്ലെന്നും സംഘാടകരെ അറിയിച്ചു.

ഭാരതാംബ വിവാദം: കേരള സർവകലാശാല രജിസ്ട്രാറെ സസ്പെൻഡ് ചെയ്ത് വി.സി

എന്നാൽ സംഘാടകർ പരിപാടിയുമായി മുന്നോട്ട് പോവുകയായിരുന്നു. ഇതിനെതിരെ എസ്എഫ്ഐയും കെഎസ്യുവും പ്രതിഷേധവുമായി രംഗത്തെത്തി. സർവകലാശാലയുടെ പ്രധാന കവാടത്തിൽ പ്രതിഷേധം നടന്നു. ഇതിനിടെ ഗവർണർ ഇവിടെയെത്തുകയും പൊലീസിൻ്റെ അകമ്പടിയോടെ സെനറ്റ് ഹാളിൽ പ്രവേശിക്കുകയും ഭാരതാംബ ചിത്രത്തിൽ പുഷ്പാർച്ചന നടത്തുകയും ചെയ്തു.

അതേസമയം, സെനറ്റ് ഹാളിനുള്ളിൽ കയറി പ്രതിഷേധിച്ച കെ.എസ്.യു പ്രവർത്തകരും സംഘാടകരും തമ്മിൽ സംഘർഷമുണ്ടായി. പ്രതിഷേധം തുടരുന്നതിനിടെ ഗവർണർ രാജേന്ദ്ര വിശ്വനാഥ ആർലേക്കർ മറ്റൊരു വഴിയിലൂടെ പുറത്തേക്ക് പോവുകയായിരുന്നു.

Story Highlights: ‘നിയമനടപടിയുമായി മുന്നോട്ട് പോകും’; കേരള യൂണിവേഴ്സിറ്റി രജിസ്ട്രാർ കെ.എസ്. അനിൽകുമാർ

രജിസ്ട്രാരെ സസ്പെൻഡ് ചെയ്ത നടപടി അംഗീകരിക്കാതെ സർക്കാർ; വൈസ് ചാൻസലർക്ക് തിരിച്ചടി