ഗുജറാത്തിലെ മുന്ദ്ര തുറമുഖത്ത് കസ്റ്റംസ് വിഭാഗം 110 കോടി രൂപ വിലമതിക്കുന്ന മയക്കുമരുന്ന് പിടികൂടി. ഫൈറ്റർ ഡ്രഗ് എന്നറിയപ്പെടുന്ന ട്രമാഡോൾ ടാബുകൾ ഉൾപ്പെടെയുള്ള ലഹരി മരുന്നുകളാണ് കണ്ടെത്തിയത്. ഈ മരുന്നുകൾ ദീർഘനേരം ഉറക്കം അകറ്റി നിർത്തുന്നതിന് സഹായകമാകുന്നു. സിയേറാ ലിയോൺ, നൈജർ തുടങ്ങിയ പശ്ചിമ ആഫ്രിക്കൻ രാജ്യങ്ങളിലേക്ക് കടത്താൻ ശ്രമിച്ചതാണ് പിടികൂടിയത്.
രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് മയക്കുമരുന്ന് കണ്ടെത്തിയത്. രാജ്കോട്ടിൽ നിന്നുള്ള ഒരു വ്യാപാരി കയറ്റി അയയ്ക്കാനായി എത്തിച്ച ചരക്ക് കണ്ടെയ്നറിലായിരുന്നു ലഹരി മരുന്നുകൾ. ഡൈക്ലോഫിനാക് എന്ന വേദനസംഹാരിയുടെ പേരിലാണ് ഇവ കൊണ്ടുവന്നത്. കണ്ടെയ്നറിന്റെ മുൻഭാഗത്തും പിൻഭാഗത്തും ഡൈക്ലോഫിനാക് വച്ച് മധ്യഭാഗത്ത് ലഹരി മരുന്ന് ഒളിപ്പിച്ചിരുന്നു.
1985-ലെ എൻഡിപിഎസ് നിയമം അനുസരിച്ച് ട്രാമാഡോൾ പോലുള്ള ലഹരി സ്വഭാവമുള്ള വേദനസംഹാരികളുടെ കയറ്റുമതി നിരോധിച്ചിട്ടുണ്ടെന്ന് കസ്റ്റംസ് ഉദ്യോഗസ്ഥർ വ്യക്തമാക്കി. അന്താരാഷ്ട്ര വിപണിയിൽ ഈ ലഹരി മരുന്നുകൾക്ക് 110 കോടി രൂപയോളം വിലവരുമെന്നാണ് കണക്കാക്കപ്പെടുന്നത്. ഈ വൻ തോതിലുള്ള മയക്കുമരുന്ന് പിടിച്ചെടുക്കൽ അന്താരാഷ്ട്ര ലഹരി മാഫിയയുടെ പ്രവർത്തനങ്ങൾക്ക് കനത്ത തിരിച്ചടിയായി.
