V. Muraleedharan on Election Complaints and Suresh Gopi's MP Status

കൊച്ചി◾: തിരഞ്ഞെടുപ്പ് കഴിഞ്ഞ ശേഷം പരാതികളുണ്ടെങ്കിൽ കോടതിയെ സമീപിക്കാവുന്നതാണെന്ന് ബിജെപി ദേശീയ നിർവാഹക സമിതി അംഗം വി. മുരളീധരൻ ട്വന്റിഫോറിനോട് പറഞ്ഞു. ആരോപണങ്ങൾ ഉന്നയിക്കുന്നതിന് മുൻപ് വോട്ടർ പട്ടികയിൽ പേര് ചേർക്കുന്ന സമയത്ത് പരാതികൾ അറിയിക്കാനുള്ള അവസരമുണ്ടെന്നും അദ്ദേഹം കൂട്ടിച്ചേർത്തു. മാധ്യമങ്ങളിലൂടെ ചർച്ച ചെയ്തതുകൊണ്ട് മാത്രം സുരേഷ് ഗോപിയുടെ എംപി സ്ഥാനം നഷ്ടപ്പെടില്ലെന്നും വി. ശിവൻകുട്ടിയുടെ തമാശകൾക്ക് മറുപടി നൽകേണ്ടതില്ലെന്നും മുരളീധരൻ വ്യക്തമാക്കി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

വോട്ടിംഗ് സമയത്ത് പോളിംഗ് ബൂത്തിൽ എല്ലാ സ്ഥാനാർത്ഥികളുടെയും ഏജന്റുമാരും ബൂത്ത് ലെവൽ ഓഫീസർമാരുമുണ്ടാകും. തിരഞ്ഞെടുപ്പ് ചോദ്യം ചെയ്തുകൊണ്ട് കോടതിയിൽ പോകാൻ സാധിക്കും. എന്നാൽ ഇതൊന്നും ചെയ്യാതെ ആരോപണം ഉന്നയിക്കുന്നത് ശരിയല്ലെന്നും വി. മുരളീധരൻ അഭിപ്രായപ്പെട്ടു. തിരഞ്ഞെടുപ്പ് കമ്മീഷൻ വോട്ടർപട്ടികയിൽ പേര് ചേർക്കാൻ അവസരം കൊടുത്തിട്ടുണ്ട്.

കോൺഗ്രസ് തൃശൂർ തോൽവിയുടെ പശ്ചാത്തലത്തിൽ അവിടുത്തെ ഡിസിസി പ്രസിഡന്റിനെ മാറ്റിയെന്നും അദ്ദേഹം ചൂണ്ടിക്കാട്ടി. തന്നെ തോൽപ്പിച്ചത് കോൺഗ്രസുകാരാണെന്ന് കെ. മുരളീധരൻ തന്നെ പറഞ്ഞിട്ടുണ്ട്. അതിനുശേഷം പൂരം കലക്കൽ വിവാദം കൊണ്ടുവന്നു, എന്നാൽ അതൊന്നും വിലപ്പോവില്ലെന്ന് മനസ്സിലാക്കിയപ്പോഴാണ് പുതിയ വിവാദവുമായി രംഗത്ത് വരുന്നതെന്നും മുരളീധരൻ കുറ്റപ്പെടുത്തി.

തിരഞ്ഞെടുപ്പിൽ പരാജയപ്പെട്ട ശേഷം ജനങ്ങളുടെ വിശ്വാസം നേടാൻ കഴിയാതെ വരുമ്പോൾ, തിരഞ്ഞെടുപ്പ് കമ്മീഷനെയും തിരഞ്ഞെടുപ്പ് പ്രക്രിയയെയും ഭരണഘടനാ സ്ഥാപനങ്ങളെയും ചോദ്യം ചെയ്യുന്നത് രാഹുൽ ഗാന്ധിയുടെ നികൃഷ്ടമായ നിലപാടാണെന്ന് വി. മുരളീധരൻ വിമർശിച്ചു. 14 വോട്ടുകൾ മാത്രമല്ല, ധാരാളം വോട്ടുകൾ ചേർത്തിട്ടുണ്ടാകുമെന്നും അദ്ദേഹം പറഞ്ഞു.

സുരേഷ് ഗോപിക്കും സഹോദരനുമെതിരെ വീണ്ടും പരാതി; അന്വേഷണം തുടങ്ങി

സുരേഷ് ഗോപിയെ കാണാനില്ലെന്ന വി. ശിവൻകുട്ടിയുടെ ആരോപണത്തിനും വി. മുരളീധരൻ മറുപടി നൽകി. വി. ശിവൻകുട്ടി ഒരു തമാശക്കാരനാണ്. ഗോവിന്ദച്ചാമി ചാടിപ്പോയപ്പോഴും ശിവൻകുട്ടി തമാശ പറഞ്ഞിരുന്നു. അദ്ദേഹത്തിന്റെ തമാശയ്ക്ക് താൻ മറുപടി പറയേണ്ടതില്ല. ആർക്കും ആരെയും കാണാനില്ലെങ്കിൽ പൊലീസിൽ പരാതി നൽകാം. സുരേഷ് ഗോപി ഇപ്പോൾ പാർലമെന്റിൽ പങ്കെടുക്കുന്നുണ്ടെന്നും അദ്ദേഹം വ്യക്തമാക്കി.

പാർലമെന്റ് സമ്മേളനം നടക്കുമ്പോൾ സുരേഷ് ഗോപി അവിടെ പങ്കെടുക്കാതെ കെ.എസ്.യു.ക്കാരന്റെ വീട്ടിൽ പോയി നിൽക്കണോയെന്ന് വി. മുരളീധരൻ ചോദിച്ചു. യുവമോർച്ച പട്ടിക താൻ കണ്ടിട്ടില്ലെന്നും അദ്ദേഹം കൂട്ടിച്ചേർത്തു. നിയമപരമായ മറ്റ് നടപടികൾ സ്വീകരിക്കാവുന്നതാണ്, അല്ലാതെ മാധ്യമങ്ങളിലൂടെ ചർച്ച ചെയ്തതുകൊണ്ട് സുരേഷ് ഗോപിയുടെ എംപി സ്ഥാനം നഷ്ടപ്പെടില്ലെന്നും അദ്ദേഹം ആവർത്തിച്ചു.

Story Highlights : V Muraleedharan Reacts to Congress Vote Chori’ Allegation

സുരേഷ് ഗോപിക്കും സഹോദരനുമെതിരെ വീണ്ടും പരാതി; അന്വേഷണം തുടങ്ങി