തൃശ്ശൂർ ജില്ലയിലെ മലക്കപ്പാറ അരേക്കാപ്പ് ഊരിലെ നിവാസികളെ പുനരധിവസിപ്പിക്കുന്നതിനുള്ള നടപടികൾ ആരംഭിച്ചു. നാലു കിലോമീറ്റർ കാൽനടയായി മാത്രമേ എത്താവുന്ന ഈ ഊരിലേക്ക് തൃശ്ശൂർ ജില്ലാ കളക്ടർ അർജുൻ പാണ്ഡ്യന്റെ നേതൃത്വത്തിൽ സംഘം എത്തി പുനരധിവാസ പദ്ധതി വിശദീകരിച്ചു. ഊരുകാർ തന്നെ അനുയോജ്യമായ സ്ഥലം കണ്ടെത്തിയാൽ അത് ഏറ്റെടുത്ത് നൽകാൻ സർക്കാർ സന്നദ്ധമാണെന്ന് അറിയിച്ചു. താമസസൗകര്യത്തോടൊപ്പം കൃഷിഭൂമിയും ഓരോ കുടുംബത്തിനും ലഭ്യമാക്കും.
മണ്ണിടിച്ചിൽ ഭീഷണി നേരിടുന്ന ഈ പ്രദേശത്ത് 28 കുടുംബങ്ങളാണ് താമസിക്കുന്നത്. രോഗികളെ പോലും നാലു കിലോമീറ്ററിലധികം ദൂരം തണ്ടിൽ ചുമന്നുകൊണ്ടുവരേണ്ട അവസ്ഥയാണ് ഇവിടെയുള്ളത്. ഇത്തരം ദുരിതാവസ്ഥ പുറംലോകത്തെ അറിയിച്ചത് 24 ന്യൂസ് ആയിരുന്നു. പരമ്പരാഗതമായി ഇവിടെ താമസിക്കുന്ന 28 കുടുംബങ്ങളുടെ കണ്ണുനീർ ഇവരും മനുഷ്യരാണെന്ന് ലോകത്തെ ഓർമ്മിപ്പിച്ചു.
വിഷയത്തിൽ അടിയന്തര ഇടപെടൽ ഉണ്ടാകുമെന്ന സർക്കാരിന്റെ പ്രഖ്യാപനത്തെ തുടർന്നാണ് ജില്ലാ കളക്ടർ തന്നെ നേരിട്ട് എത്തി പുനരധിവാസ പ്രവർത്തനങ്ങൾ പ്രദേശവാസികളെ അറിയിച്ചത്. 20 കുടുംബങ്ങൾ മാറ്റിപ്പാർപ്പിനു സന്നദ്ധത അറിയിച്ചു. ഇവർക്ക് മലക്കപ്പാറയിൽ തന്നെ താമസസൗകര്യവും കൃഷിഭൂമിയും ഒരുക്കാനാണ് നീക്കം. പുനരധിവാസ പ്രവർത്തനങ്ങൾ വേഗത്തിൽ പൂർത്തിയാക്കാനാണ് ജില്ലാ ഭരണകൂടത്തിന്റെ ശ്രമം.
Story Highlights: Malakappara Arekap residents in Thrissur to be rehabilitated due to landslide threat
Image Credit: twentyfournews
