ചാമ്പ്യൻസ് ട്രോഫി: പാകിസ്താനിലേക്ക് ഇന്ത്യൻ ടീം പോകില്ല, ബിസിസിഐ നിലപാട് കടുപ്പിച്ചു

ഐസിസി ചാമ്പ്യൻസ് ട്രോഫി മത്സരങ്ങൾക്കായി ഇന്ത്യൻ ടീം പാകിസ്താനിലേക്ക് പോകില്ലെന്ന് റിപ്പോർട്ടുകൾ സൂചിപ്പിക്കുന്നു. ബിസിസിഐ ഈ തീരുമാനം എടുത്തതായാണ് വിവരം. ദുബായിലോ ശ്രീലങ്കയിലോ മത്സരങ്ങൾ നടത്തണമെന്ന് ഐസിസിയോട് ബിസിസിഐ ആവശ്യപ്പെട്ടതായി എഎൻഐ റിപ്പോർട്ട് ചെയ്യുന്നു. ഏഷ്യാ കപ്പിന്റെ മാതൃകയിൽ ഇന്ത്യയുടെ മത്സരങ്ങൾ ഹൈബ്രിഡ് രീതിയിൽ നടത്തണമെന്നാണ് ബിസിസിഐയുടെ നിലപാട്.

ബിസിസിഐയുടെ എതിർപ്പിനെ തുടർന്ന് ചാമ്പ്യൻസ് ട്രോഫിയിൽ ഇന്ത്യയുടെ മത്സരങ്ങൾ ലാഹോറിൽ മാത്രം നടത്താമെന്ന നിർദേശം പാക് ക്രിക്കറ്റ് ബോർഡ് മുന്നോട്ടുവെച്ചിരുന്നു. സുരക്ഷാ കാരണങ്ങളാൽ ആയിരുന്നു ഈ നിർദേശം. എന്നാൽ ഇതിനോടും ബിസിസിഐ അനുകൂല നിലപാടല്ല സ്വീകരിച്ചിരിക്കുന്നത്. 2008 ന് ശേഷം ഇന്ത്യ പാക്കിസ്ഥാനിൽ പര്യടനം നടത്തിയിട്ടില്ല. രാഷ്ട്രീയ കാരണങ്ങളാലാണ് ഇത്തരത്തിലൊരു നിലപാട് ബിസിസിഐ സ്വീകരിച്ചിരിക്കുന്നത്.

അടുത്ത വർഷം ഫെബ്രുവരി 19 മുതൽ മാർച്ച് 9 വരെയാണ് പാകിസ്താനിൽ ചാമ്പ്യൻസ് ട്രോഫി ടൂർണമെന്റ് നടക്കുന്നത്. മത്സരക്രമം പാക് ക്രിക്കറ്റ് ബോർഡ് ഐസിസിക്ക് കൈമാറിയിട്ടുണ്ട്. ഇതനുസരിച്ച് മാർച്ച് ഒന്നിന് ലാഹോറിലാണ് ഇന്ത്യ-പാകിസ്താൻ മത്സരം നിശ്ചയിച്ചിരിക്കുന്നത്. എന്നാൽ ഇപ്പോഴത്തെ സാഹചര്യത്തിൽ ഈ മത്സരം നടക്കുമോ എന്നത് അനിശ്ചിതത്വത്തിലാണ്.