സുനിതാ വില്യംസിന്റെ തിരിച്ചുവരവ്: നാസയുടെ തീരുമാനം ഇന്ന്

അന്താരാഷ്ട്ര ബഹിരാകാശ നിലയത്തിൽ തുടരുന്ന ഇന്ത്യൻ വംശജയായ അമേരിക്കൻ ബഹിരാകാശ യാത്രിക സുനിതാ വില്യംസിന്റെയും വിൽമോർ ബുച്ചിന്റെയും തിരിച്ചുവരവുമായി ബന്ധപ്പെട്ട അന്തിമ തീരുമാനം ശനിയാഴ്ച (ആഗസ്റ്റ് 24) ഉണ്ടാകും. ബോയിംഗിന്റെ സ്റ്റാർലൈനർ പേടകം തകരാറിലായതിനെ തുടർന്നാണ് ഇരുവരുടെയും മടങ്ങിവരവ് അനിശ്ചിതത്വത്തിലായത്. സ്റ്റാർലൈനർ സുരക്ഷിതമാണോ എന്നത് ഉന്നതതല യോഗം തീരുമാനിക്കും. ഇതുമായി ബന്ധപ്പെട്ട പ്രഖ്യാപനം നാളെത്തന്നെയുണ്ടാകുമെന്ന് നാസ ഔദ്യോഗിക പ്രസ്താവനയിൽ അറിയിച്ചു.

2024 ജൂൺ അഞ്ചിനാണ് സുനിത വില്യംസും ബുച്ച് വിൽമോറും സ്റ്റാർലൈനർ പേടകത്തിൽ ഒരാഴ്ച നീണ്ട ദൗത്യത്തിനായി രാജ്യാന്തര ബഹിരാകാശ നിലയത്തിലേക്ക് യാത്ര തിരിച്ചത്. എന്നാൽ പേടകത്തിലെ ഹീലിയം ചോർച്ച, വാൽവ് പിഴവുകൾ അടക്കമുള്ള തകരാറുകൾ കനത്ത വെല്ലുവിളിയായി. ഇതിന്റെ കാരണത്തെക്കുറിച്ച് നാസയും ബോയിംഗും പരിശോധിച്ചുകൊണ്ടിരിക്കുകയാണ്. ബഹിരാകാശ കേന്ദ്രത്തിൽ ബുച്ചും സുനിതയും സുരക്ഷിതരാണെന്ന് അറിയിച്ചിട്ടുണ്ട്.

തകരാറിലുള്ള സ്റ്റാർലൈനർ പേടകത്തിൽ മടങ്ങാൻ ശ്രമിച്ചാൽ ഇരുവരെയും കാത്തിരിക്കുന്നത് പലതരത്തിലുള്ള അപകടങ്ങളാണെന്നാണ് വിദഗ്ധർ അഭിപ്രായപ്പെടുന്നത്. കുത്തനെയുള്ള റീ എൻട്രി ആംഗിൾ, താഴ്ന്ന ആംഗിളിലുള്ള റീ എൻട്രി, മടങ്ങിവരവിൽ ത്രസ്റ്ററുകൾ തകരാറിലാകൽ എന്നിവയാണ് പ്രധാന അപകട സാധ്യതകൾ. സ്പേസ് എക്സിന്റെ ഡ്രാഗൺ പേടകത്തിൽ ഇരുവരെയും തിരിച്ചെത്തിക്കുന്നത് നാസ പരിഗണിക്കണമെന്നാണ് വിദഗ്ധരുടെ അഭിപ്രായം. അങ്ങനെയാണെങ്കിൽ 2025 ഫെബ്രുവരി വരെ ഇരുവരും അന്താരാഷ്ട്ര ബഹിരാകാശ നിലയത്തിൽ തുടരേണ്ടതായി വരും.

Story Highlights: NASA to decide on Sunita Williams’ return from International Space Station amid Starliner spacecraft issues