മലയാള സിനിമയിലെ യുവ സൂപ്പർ താരം ദുൽഖർ സൽമാന് ഇന്ന് നാൽപ്പത്തിയൊന്നാം പിറന്നാൾ ആഘോഷമാണ്. 2012-ൽ ‘സെക്കൻഡ് ഷോ’ എന്ന ചിത്രത്തിലൂടെ സിനിമാ ലോകത്തേക്ക് പ്രവേശിച്ച ദുൽഖർ, നാൽപതോളം ചിത്രങ്ങളിലൂടെ അഭിനയജീവിതത്തിൽ വ്യാഴവട്ടം പൂർത്തിയാക്കിയിരിക്കുകയാണ്. തെന്നിന്ത്യൻ സിനിമാ ലോകത്തും ബോളിവുഡിലും തന്‍റേതായ വ്യക്തിമുദ്ര പതിപ്പിക്കാൻ ദുൽഖറിന് കഴിഞ്ഞിട്ടുണ്ട്.
നിലവിൽ താരം കുടുംബത്തിനൊപ്പം യാത്രയിലാണ്. ചെന്നൈയിൽ നിന്ന് കൊളംബോ വഴി മാലിദ്വീപിലേക്കുള്ള യാത്രയിൽ ദുൽഖറിന് പിറന്നാൾ ആശംസകൾ നേർന്ന് ശ്രീലങ്കൻ എയർലൈൻസ് രംഗത്തെത്തി. താരത്തിന്റെ ആഘോഷങ്ങളുടെ ഭാഗമാകാൻ കഴിഞ്ഞതിൽ സന്തോഷമുണ്ടെന്ന് എയർലൈൻസ് അറിയിച്ചു. ദുൽഖറിനൊപ്പം ഭാര്യയും മകൾ മറിയമും യാത്രയിലുണ്ട്.
12 വർഷത്തെ സിനിമാ ജീവിതത്തിനിടെ യുവാക്കളുടെ പ്രിയപ്പെട്ട താരമായി മാറിയ ദുൽഖർ, തെന്നിന്ത്യയിലെ യുവജനതയെ കൈയ്യിലെടുത്തിട്ടുണ്ട്. പിറന്നാൾ ആഘോഷത്തിന്റെ ഭാഗമായി മകളെ മടിയിൽ ഇരുത്തി കേക്ക് മുറിക്കുന്ന ചിത്രവും പങ്കുവെച്ചിട്ടുണ്ട്. ഒരുപിടി നല്ല ചിത്രങ്ങളിലൂടെ തന്റെ പ്രതിഭ തെളിയിച്ച ദുൽഖറിന് ആരാധകർ ഒരുക്കുന്ന പിറന്നാൾ ആശംസകളും ശ്രദ്ധേയമാണ്.
