കർണാടകയിലെ ഷിരൂരിൽ മണ്ണിടിച്ചിലിൽ കാണാതായവർക്കായുള്ള തിരച്ചിൽ നാളെ പുനരാരംഭിക്കും. മലയാളിയായ അർജുൻ ഉൾപ്പെടെ മൂന്നു പേരെയാണ് ഇനിയും കണ്ടെത്താനുള്ളത്. ഷിരൂർ സ്വദേശി ജഗന്നാഥ്, ഗംഗേകൊല്ല സ്വദേശി ലോകേഷ് എന്നിവരാണ് മറ്റു രണ്ടുപേർ. ജൂലൈ പതിനാറിനാണ് മണ്ണിടിച്ചിലിൽ 11 പേരെ കാണാതായത്. ഇതിൽ 8 പേരുടെ മൃതദേഹം ഇതിനകം കണ്ടെത്തിയിട്ടുണ്ട്.
ഗോവ തുറമുഖത്ത് നിന്ന് ഇന്നലെ കാർവാറിൽ എത്തിച്ച ഡ്രഡ്ജർ ഇന്ന് വൈകിട്ടോടെ ഷിരൂരിലെത്തിക്കും. യാത്രാമധ്യേയുള്ള രണ്ട് പാലങ്ങൾ കടക്കാൻ പുഴയിലെ വേലിയിറക്ക സമയം കണക്കാക്കിയാണ് ശ്രമം. ഗംഗാവലി പുഴയിലെ അടിയൊഴുക്ക് മൂന്ന് നോട്സിൽ താഴെയാണെന്ന് നാവികസേനയുടെ പരിശോധനയിൽ കണ്ടെത്തി. ഷിരൂരിലെ നിലവിലെ കാലാവസ്ഥയും തിരച്ചിലിന് അനുകൂലമാണ്.
പുഴയിൽ നാവികസേന അടയാളപ്പെടുത്തിയ ഇടത്തെ മണ്ണും കല്ലുകളുമാണ് ഡ്രഡ്ജർ ഉപയോഗിച്ച് ആദ്യം നീക്കം ചെയ്യുക. ഈ പ്രദേശത്താണ് കാണാതായവരെ കണ്ടെത്താനാകുമെന്ന് പ്രതീക്ഷിക്കുന്നത്. തിരച്ചിൽ ദൗത്യത്തിന് നാവികസേനയും സ്ഥലവാസികളും സഹകരിക്കുന്നുണ്ട്. കാണാതായവരുടെ കുടുംബാംഗങ്ങൾ ആശങ്കയോടെ കാത്തിരിക്കുകയാണ്.
Story Highlights: Search for missing persons including Arjun to resume in Shiroor, Karnataka landslide site
