ബംഗാളി നടി സുദിപ ചാറ്റർജി തനിക്കെതിരേ വധഭീഷണി ഉയരുന്നതായി വെളിപ്പെടുത്തി. ബംഗ്ലാദേശ് ആസ്ഥാനമാക്കി പ്രവർത്തിക്കുന്ന ചാനലിൽ ഈദ് ആഘോഷത്തോടനുബന്ധിച്ച്‌ നടത്തിയ പാചക മത്സരത്തിന്റെ വീഡിയോ സമൂഹ മാധ്യമങ്ങളില്‍ പ്രചരിച്ചതിന് പിന്നാലെയാണ് ഇത്. മത്സരാർഥി ബീഫ് പാകം ചെയ്തതിനെ തുടർന്നാണ് ഭീഷണി ഉയർന്നത്.
തീ കൊളുത്തി കൊലപ്പെടുത്തുമെന്നും മകനെ തട്ടിക്കൊണ്ടുപോകുമെന്നും ഭീഷണിയുണ്ടെന്നും സുദീപ പറഞ്ഞു. മരിച്ചു പോയ തന്റെ അമ്മയെ പോലും അധിക്ഷേപ വാക്കുകള്‍ കൊണ്ട് ആക്രമിക്കുന്നുവെന്നും അവർ കൂട്ടിച്ചേർത്തു. താൻ ഒരിക്കലും ബീഫ് കഴിച്ചിട്ടില്ലെന്നും തൊട്ടു നോക്കുക പോലും ചെയ്തിട്ടില്ലെന്നും നടി വ്യക്തമാക്കി. മത്സരാർത്ഥിയാണ് പാചകം ചെയ്തതെന്നും എഡിറ്റ് ചെയ്യാത്ത വീഡിയോയാണിതെന്നും അവർ പറഞ്ഞു. ബംഗ്ലാദേശിന്റെ ഔദ്യോഗിക ഭക്ഷണങ്ങളില്‍ ഒന്നാണ് ബീഫ് എന്ന് സംഘാടകർ പറഞ്ഞതായും ആരുടേയും മതവികാരം വൃണപ്പെടുത്താൻ ആഗ്രഹിക്കുന്നില്ലെന്നും നടി കൂട്ടിച്ചേർത്തു.
