തെന്നിന്ത്യൻ സിനിമാ ലോകത്തെ പ്രമുഖ താരദമ്പതികളായിരുന്ന സാമന്തയുടെയും നാഗചൈതന്യയുടെയും വിവാഹമോചനം ഇപ്പോഴും പലർക്കും അംഗീകരിക്കാൻ കഴിഞ്ഞിട്ടില്ല. ഈ സാഹചര്യത്തിലാണ് തെലങ്കാന പരിസ്ഥിതി, വനം വകുപ്പ് മന്ത്രി കൊണ്ട സുരേഖ ഗുരുതരമായ ആരോപണവുമായി രംഗത്തെത്തിയത്. സാമന്തയുടെയും നാഗചൈതന്യയുടെയും വിവാഹമോചനത്തിന് കാരണം തെലങ്കാന മുൻ മുഖ്യമന്ത്രി കെ ചന്ദ്രശേഖർ റാവുവിന്റെ മകൻ കെ ടി രാമറാവുവാണെന്നായിരുന്നു മന്ത്രിയുടെ പരാമർശം. കെടിആർ മയക്കുമരുന്ന് ഉപയോഗിക്കാറുണ്ടെന്നും നടിമാരുടെ ഫോണുകൾ ചോർത്തി ബ്ലാക് മെയിൽ ചെയ്‌തെന്നും സുരേഖ ആരോപിച്ചു.
നാഗചൈതന്യയുടെ പിതാവ് നാഗാർജുനയുടെ ഉടമസ്ഥതയിലുള്ള എൻ-കൺവെൻഷൻ പൊളിച്ചുമാറ്റാതിരിക്കാൻ പകരമായി സാമന്തയെ തന്റെ അടുത്തേയ്ക്ക് അയയ്ക്കണമെന്ന് കെടിആർ ആവശ്യപ്പെട്ടെന്നും ഇത് സാമന്ത വിസമ്മതിച്ചതോടെയാണ് വിവാഹമോചിതരാവാൻ കാരണമായതെന്നുമായിരുന്നു മന്ത്രിയുടെ മറ്റൊരു ആരോപണം. ഈ പരാമർശങ്ങൾക്കെതിരെ വ്യാപക പ്രതിഷേധങ്ങളാണ് ഉയർന്നത്. സാമന്തയും നാഗചൈതന്യയും മന്ത്രിക്ക് മറുപടിയുമായി രംഗത്തെത്തി.
തന്റെ വിവാഹമോചനം വ്യക്തിപരമായ കാര്യമാണെന്നും ഊഹാപോഹങ്ങളിൽ മുഴുകി രാഷ്ട്രീയ പോരാട്ടങ്ങളിലേക്ക് തന്റെ പേര് വലിച്ചിഴക്കരുതെന്ന് സാമന്ത പ്രതികരിച്ചു. സ്ത്രീകളെ പരിഗണിക്കാത്ത ഒരു ഗ്ലാമറസ് വ്യവസായത്തിൽ അതിജീവിക്കാനും പ്രണയത്തിലാകാനും പ്രണയത്തിൽ നിന്ന് പിന്തിരിയാനും വളരെയധികം ധൈര്യവും ശക്തിയും ആവശ്യമാണെന്നും അവർ കൂട്ടിച്ചേർത്തു. വ്യക്തികളുടെ സ്വകാര്യതയോട് ഉത്തരവാദിത്തവും ബഹുമാനവും പുലർത്താൻ മന്ത്രിയോട് അഭ്യർത്ഥിച്ച സാമന്ത, തന്റെ വിവാഹമോചനം പരസ്പര സമ്മതത്തോടെയും സൗഹാർദ്ദപരമായിരുന്നുവെന്നും രാഷ്ട്രീയ ഗൂഢാലോചന ഉൾപ്പെട്ടിട്ടില്ലെന്നും വ്യക്തമാക്കി.
Story Highlights: Telangana minister’s controversial remarks about Samantha and Naga Chaitanya’s divorce spark outrage and responses from the actors
