പ്രശസ്ത അമേരിക്കൻ നടനും എഴുത്തുകാരനുമായ റോൺ പിയേഴ്സ് ഇലൈ 86-ാം വയസ്സിൽ അന്തരിച്ചു. ‘ടാർസൻ’ ടെലിവിഷൻ സീരീസിലൂടെ പ്രേക്ഷകരുടെ മനം കവർന്ന താരം സെപ്റ്റംബർ 29-ന് കാലിഫോർണിയയിലെ വീട്ടിൽ വച്ചാണ് അന്ത്യശ്വാസം വലിച്ചത്. മകൾ കിർസ്റ്റിൻ കാസലെ ഇലൈ സോഷ്യൽ മീഡിയയിൽ പങ്കുവച്ച കുറിപ്പിലൂടെയാണ് ഈ വാർത്ത പുറംലോകം അറിഞ്ഞത്.
“ലോകത്തിന് ഏറ്റവും മികച്ച മനുഷ്യരിൽ ഒരാളെയും എനിക്ക് എന്റെ അച്ഛനേയും നഷ്ടപ്പെട്ടു” എന്ന് പറഞ്ഞുകൊണ്ടാണ് കാസലെ ഇലൈ തന്റെ കുറിപ്പ് ആരംഭിച്ചത്. അച്ഛന്റെ സ്നേഹം മനസ്സിലാക്കിയാൽ ഈ ലോകം കൂടുതൽ തിളക്കമുള്ളതും അർത്ഥവത്തായതുമാകുമെന്നും അവർ വൈകാരികമായി കുറിച്ചു. അച്ഛനൊപ്പമുള്ള കുട്ടിക്കാല ചിത്രങ്ങളും അവർ പങ്കുവച്ചിരുന്നു.
1966 മുതൽ 1968 വരെ സംപ്രേഷണം ചെയ്ത ‘ടാർസൻ’ സീരീസിൽ ടാർസന്റെ വേഷത്തിലെത്തിയത് റോൺ ആയിരുന്നു. അപകടം നിറഞ്ഞ സീനുകളിൽ ഡ്യൂപ്പില്ലാതെ അഭിനയിച്ച് നിരവധി പരിക്കുകൾ പറ്റിയിട്ടുണ്ട്. 2001-ൽ അദ്ദേഹം അഭിനയത്തിൽ നിന്ന് ഇടവേളയെടുത്ത് എഴുത്തുകാരനായി. രണ്ട് നോവലുകളും അദ്ദേഹം പ്രസിദ്ധീകരിച്ചിട്ടുണ്ട്.
View this post on Instagram
Story Highlights: Ron Ely, famous for playing Tarzan in TV series, dies at 86
