കർണാടകയിലെ ഷിരൂരിൽ കാണാതായ അർജുനെ കണ്ടെത്താനുള്ള തിരച്ചിൽ ഏഴാം ദിവസവും തുടരുകയാണ്. കോഴിക്കോട് മുക്കത്ത് നിന്നുള്ള 18 അംഗ രക്ഷാദൗത്യസംഘം ഷിരൂരിലേക്ക് പുറപ്പെട്ടു. എൻ്റെ മുക്കം, പുൽപറമ്പ് രക്ഷാസേന, കർമ ഓമശ്ശേരി എന്നീ സന്നദ്ധ സംഘടനകളിലെ അംഗങ്ങളും രക്ഷാപ്രവർത്തന വിദഗ്ധരും ഈ സംഘത്തിലുണ്ട്.
കരയിലും പുഴയിലും തിരച്ചിൽ നടക്കുന്നുണ്ട്. സൈന്യം ഇന്ന് മണ്ണിൽ 15 മീറ്റർ ആഴത്തിൽ മെറ്റൽ സാന്നിധ്യം കണ്ടെത്താനാകുന്ന റഡാർ സംവിധാനം എത്തിക്കും. ഗംഗാവാലി പുഴയിൽ എൻഡിആർഎഫും നാവികസേനയുടെ സ്കൂബ സംഘവും തിരച്ചിൽ നടത്തും. റഡാർ സിഗ്നലുകൾ ലഭിച്ചയിടങ്ങളിൽ മണ്ണ് നീക്കി നടത്തിയ പരിശോധനയിൽ ലോറിയുടെ ഭാഗങ്ങൾ കണ്ടെത്താനായില്ല.
ഇന്ന് മണ്ണ് നീക്കിയുള്ള തിരച്ചിൽ അവസാനിപ്പിക്കുമെന്ന അഭ്യൂഹങ്ങളും പുറത്തുവരുന്നുണ്ട്. രാവിലെ കനത്ത മഴ പെയ്തതിനാൽ തിരച്ചിൽ വൈകിയാണ് ആരംഭിച്ചത്. മണ്ണ് നീക്കം ചെയ്യാത്ത കൂടുതൽ സ്ഥലങ്ങളിലേക്ക് റഡാറിന്റെ സഹായത്തോടെ തിരച്ചിൽ വ്യാപിപ്പിക്കാനാണ് തീരുമാനം. ഇത് രക്ഷാദൗത്യത്തെ ബാധിച്ചിരുന്നു.
