Rahul and Priyanka Gandhi to visit Wayanad: Thanksgiving tour

വയനാട്ടിലെ ജനങ്ങളോടുള്ള നന്ദി പ്രകടിപ്പിക്കാൻ രാഹുൽ ഗാന്ധിയും പ്രിയങ്ക ഗാന്ധിയും ഇന്ന് കേരളത്തിലെത്തും. ലോക്സഭാ തെരഞ്ഞെടുപ്പിലെ വിജയത്തിന് പിന്നാലെയാണ് ഈ സന്ദർശനം. കരിപ്പൂർ വിമാനത്താവളത്തിൽ എത്തിച്ചേരുന്ന ഇരുവരും ആദ്യം മണ്ഡലത്തിന്റെ ഭാഗമായ മുക്കത്ത് 12 മണിക്ക് പരിപാടിയിൽ പങ്കെടുക്കും.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

തുടർന്ന് മലപ്പുറം ജില്ലയിലെ കരുളായി, വണ്ടൂർ, എടവണ്ണ എന്നീ സ്ഥലങ്ങളിൽ നടക്കുന്ന പരിപാടികളിലും അവർ സംബന്ധിക്കും. കരുളായിയിലും വണ്ടൂരിലും റോഡ് ഷോകൾ സംഘടിപ്പിച്ചിട്ടുണ്ട്. നാളെ മാനന്തവാടി, സുൽത്താൻ ബത്തേരി, കൽപ്പറ്റ എന്നിവിടങ്ങളിലെ സമ്മേളനങ്ങളിൽ പങ്കെടുത്ത ശേഷം അവർ ഡൽഹിയിലേക്ക് മടങ്ങും. ഈ സന്ദർശനത്തെ ആഘോഷമാക്കാൻ പ്രവർത്തകർ സജീവമായി ഒരുങ്ങുകയാണ്.

കഴിഞ്ഞ വ്യാഴാഴ്ചയാണ് പ്രിയങ്ക ഗാന്ധി ലോക്സഭാംഗമായി സത്യപ്രതിജ്ഞ ചെയ്തത്. ഭരണഘടന ഉയർത്തിപ്പിടിച്ചുകൊണ്ടായിരുന്നു വയനാട് എംപിയായി അവർ സത്യപ്രതിജ്ഞ ചെയ്തത്. ഇതോടെ നെഹ്റു കുടുംബത്തിൽ നിന്നുള്ള മൂന്ന് അംഗങ്ങൾ പാർലമെന്റിൽ സാന്നിധ്യമായി. രാഹുൽ ഗാന്ധി ലോക്സഭാംഗവും സോണിയ ഗാന്ധി രാജ്യസഭാംഗവുമാണ്. അമ്മ സോണിയ ഗാന്ധിക്കൊപ്പമാണ് പ്രിയങ്ക പാർലമെന്റിലേക്ക് എത്തിയത്. ഭർത്താവ് റോബർട്ട് വാദ്രയും മക്കളും പ്രിയങ്കയുടെ സത്യപ്രതിജ്ഞ ചടങ്ങിൽ സാക്ഷ്യം വഹിച്ചു.