മദ്യനയ അഴിമതി കേസിൽ അരവിന്ദ് കെജ്രിവാളിനും ആം ആദ്മി പാർട്ടിക്കും എതിരെയുള്ള അന്വേഷണം പൂർത്തിയായതായി എൻഫോഴ്സ്മെന്റ് ഡയറക്ടറേറ്റ് (ഇഡി) അറിയിച്ചു. കുറ്റപത്രത്തിൽ കെജ്‌രിവാളിനെയും ആം ആദ്മി പാർട്ടിയെയും യഥാക്രമം 37-ാമത്തെയും 38-ാമത്തെയും പ്രതികളായി ഉൾപ്പെടുത്തിയിരിക്കുന്നു. സാമ്പത്തിക സ്രോതസ്സുകൾ കണ്ടെത്തുന്ന നടപടികൾ വേഗത്തിൽ പൂർത്തിയാക്കുമെന്നും സമയബന്ധിതമായ വിചാരണയ്ക്കായി ഉടൻ കോടതിയെ സമീപിക്കുമെന്നും ഇഡി വ്യക്തമാക്കി.
ഇഡി രജിസ്റ്റർ ചെയ്ത കേസിൽ സുപ്രീം കോടതി കെജ്രിവാളിന് ഇടക്കാല ജാമ്യം അനുവദിച്ചിരുന്നെങ്കിലും, സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) അന്വേഷിക്കുന്ന മറ്റൊരു അഴിമതിക്കേസിൽ അറസ്റ്റിലായതിനാൽ അദ്ദേഹം ഇപ്പോഴും ജയിലിലാണ്. അറസ്റ്റ് നിയമവിരുദ്ധമാണെന്ന് ചൂണ്ടിക്കാട്ടി കെജ്രിവാൾ നൽകിയ ഹർജിയിൽ, അറസ്റ്റിന്റെ മാനദണ്ഡങ്ങൾ പാലിച്ചിരുന്നോ എന്ന് പരിശോധിക്കണമെന്ന് ജസ്റ്റിസുമാരായ സഞ്ജീവ് ഖന്നയും ദീപാങ്കർ ദത്തയും ആവശ്യപ്പെട്ടു.
കള്ളപ്പണം വെളുപ്പിക്കൽ നിയമത്തിലെ വകുപ്പ് 19-ലെ വ്യവസ്ഥകൾക്ക് വിധേയമാണോ എന്നും പരിശോധിക്കാൻ കോടതി നിർദേശിച്ചു. കെജ്രിവാൾ 90 ദിവസം ജയിൽവാസം അനുഭവിച്ചു കഴിഞ്ഞതായി ജസ്റ്റിസ് സഞ്ജീവ് ഖന്ന ചൂണ്ടിക്കാട്ടി. കേസിലെ നിയമവിഷയങ്ങൾ മൂന്നംഗ ബെഞ്ചിന് വിട്ടിരിക്കുകയാണ്.
