വരുമാന നികുതി അടയ്ക്കുന്ന വ്യക്തികളുടെ വിവരങ്ങൾ സൂക്ഷിക്കുന്നതിനായി ആദായ നികുതി വകുപ്പ് നടപ്പിലാക്കിയ സംവിധാനമാണ് പെർമനന്റ് അക്കൗണ്ട് നമ്പർ അഥവാ പാൻ. നിയമവിരുദ്ധ പണമിടപാടുകളും കള്ളപ്പണവും തടയുക എന്ന ലക്ഷ്യത്തോടെയാണ് ആദായനികുതി നിയമത്തിലെ 139(എ) വകുപ്പ് പ്രകാരം പാൻ സംവിധാനം രൂപകൽപ്പന ചെയ്തിരിക്കുന്നത്.
പാൻ, ടാൻ സേവനങ്ങൾ നവീകരിക്കുന്നതിനും കൂടുതൽ കാര്യക്ഷമമാക്കുന്നതിനുമായി വിപുലമായ ഇ-ഗവേണൻസ് സംവിധാനം ഉപയോഗിച്ച് നടപ്പിലാക്കുന്ന പദ്ധതിയാണ് പാൻ 2.0. വിവിധ പ്ലാറ്റ്ഫോമുകളെ ഒരു ഏകീകൃത സംവിധാനത്തിലേക്ക് കൊണ്ടുവരികയും അതുവഴി ആവർത്തിച്ചുള്ള പാൻ അപേക്ഷകൾ കണ്ടെത്തി ഇല്ലാതാക്കുകയും ചെയ്യുന്നതാണ് ഈ പദ്ധതിയുടെ പ്രധാന ലക്ഷ്യം.
പാൻ കാർഡ് ഒരു പ്രധാന തിരിച്ചറിയൽ രേഖ കൂടിയാണ്. എന്നാൽ, ഒന്നിലധികം പാൻ കാർഡുകൾ കൈവശം വയ്ക്കുന്നതോ, തെറ്റായ വിവരങ്ങൾ നൽകുന്നതോ, ആവശ്യമുള്ളപ്പോൾ പാൻ കാർഡ് ഹാജരാക്കാതിരിക്കുന്നതോ ഗുരുതരമായ നിയമലംഘനമാണ്. ഇത്തരം പ്രവർത്തികൾക്ക് ആദായനികുതി നിയമത്തിലെ സെക്ഷൻ 272B പ്രകാരം 10,000 രൂപ വരെ പിഴ ചുമത്താവുന്നതാണ്.
പാൻ കാർഡ് ഇല്ലാത്തതും നിയമപരമായി കുറ്റകരമാണ്. നികുതി അടയ്ക്കുന്ന ഓരോ വ്യക്തിയും പാൻ കാർഡ് കൈവശം വയ്ക്കേണ്ടത് നിർബന്ധമാണ്. ഇത് സാമ്പത്തിക ഇടപാടുകളിൽ സുതാര്യത ഉറപ്പാക്കുന്നതിനും നികുതി വെട്ടിപ്പ് തടയുന്നതിനും സഹായകമാകുന്നു. അതുകൊണ്ടുതന്നെ, എല്ലാ പൗരന്മാരും പാൻ കാർഡ് സൂക്ഷിക്കുകയും ആവശ്യമായ സന്ദർഭങ്ങളിൽ ഹാജരാക്കുകയും ചെയ്യേണ്ടത് അത്യാവശ്യമാണ്.
Story Highlights: India’s Income Tax Department introduces PAN 2.0 for streamlined tax identification and e-governance
