69-ാമത് നെഹ്‌റുട്രോഫി ജലോത്സവത്തിന്റെ പബ്ലിസിറ്റി കമ്മിറ്റി 2023ലെ മാധ്യമ അവാര്‍ഡുകള്‍ പ്രഖ്യാപിച്ചു. ജില്ല കളക്ടര്‍ അലക്‌സ് വര്‍ഗീസ് ആണ് പുരസ്‌കാര തീരുമാനം അറിയിച്ചത്. എന്‍.ടി.ബി.ആര്‍. സൊസൈറ്റിയുടെയും മാധ്യമ അവാര്‍ഡ് കമ്മിറ്റിയുടെയും ചെയര്‍പേഴ്‌സണാണ് അദ്ദേഹം.
ദൃശ്യമാധ്യമങ്ങളിലെ മികച്ച റിപ്പോര്‍ട്ടര്‍, ക്യാമറാപേഴ്‌സണ്‍ പുരസ്‌കാരങ്ങള്‍ 24 ന്യൂസ് സീനിയര്‍ റിപ്പോര്‍ട്ടര്‍ മനീഷ് മഹിപാലും ക്യാമറാമാന്‍ എം.ടി. അഥീഷും യഥാക്രമം നേടി. 24 ന്യൂസില്‍ സംപ്രേഷണം ചെയ്ത വള്ളംകളി സ്‌പെഷ്യല്‍ വാര്‍ത്തകള്‍ക്കാണ് ഈ പുരസ്‌കാരങ്ങള്‍ ലഭിച്ചത്. ജലമേളയുടെ പ്രചരണത്തിനു സഹായകമായ റിപ്പോര്‍ട്ട്, വാര്‍ത്താചിത്രം, ടി.വി. വാര്‍ത്താ റിപ്പോര്‍ട്ടര്‍, ക്യാമറാപേഴ്‌സണ്‍ എന്നീ വിഭാഗങ്ങള്‍ക്കാണ് അവാര്‍ഡുകള്‍ ഏര്‍പ്പെടുത്തിയത്.
പുരസ്‌കാരത്തില്‍ ട്രോഫി, 10,001 രൂപ, സാക്ഷ്യപത്രം എന്നിവ ഉള്‍പ്പെടുന്നു. ഓഗസ്റ്റ് 10ന് വള്ളംകളി വേദിയില്‍വെച്ച് പുരസ്‌കാരങ്ങള്‍ വിതരണം ചെയ്യും. നെഹ്‌റുട്രോഫി ജലമേളയുടെ ഭാഗമായി അച്ചടി, ദൃശ്യമാധ്യമങ്ങളില്‍ വന്ന റിപ്പോര്‍ട്ടുകളെയാണ് പരിഗണിച്ചത്.
