Nayanthara's Love Story Revealed in New Documentary

തെന്നിന്ത്യൻ ലേഡി സൂപ്പർസ്റ്റാർ നയൻതാരയുടെ ജീവിതത്തിലെ പ്രധാന വഴിത്തിരിവുകൾ വെളിപ്പെടുത്തുന്ന ‘നയന്താര: ബിയോണ്ട് ദ് ഫെയറി ടെയ്ൽ’ എന്ന ഡോക്യുമെന്ററി ഫിലിം ഈ മാസം 18-ന് റിലീസ് ചെയ്യുകയാണ്. ഗൗതം വാസുദേവ മേനോൻ സംവിധാനം ചെയ്ത ഈ ചിത്രം നയൻതാരയുടെയും സംവിധായകൻ വിഘ്നേഷ് ശിവന്റെയും പ്രണയവും വിവാഹവും ഉൾപ്പെടെയുള്ള വിശേഷങ്ങൾ പങ്കുവയ്ക്കുന്നു. വിവാഹം കഴിഞ്ഞ് രണ്ട് വർഷത്തിന് ശേഷമാണ് ഇരുവരുടെയും പ്രണയകഥ പുറംലോകത്തെ അറിയിക്കുന്നത്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

2015-ൽ ‘നാനും റൗഡി താൻ’ എന്ന ചിത്രത്തിന്റെ ലൊക്കേഷനിൽ വച്ചാണ് ഇരുവരുടെയും പ്രണയം തുടങ്ങുന്നതെന്ന് ഡോക്യുമെന്ററിയിൽ വെളിപ്പെടുത്തുന്നു. പോണ്ടിച്ചേരിയിലെ റോഡിൽ സിനിമയുടെ ചിത്രീകരണത്തിനിടെ, വിഘ്നേഷ് വിജയ് സേതുപതിയുമായി സംസാരിക്കുന്നത് കണ്ടപ്പോഴാണ് നയൻതാര അദ്ദേഹത്തെ വ്യത്യസ്തമായി കാണാൻ തുടങ്ങിയതെന്ന് പറയുന്നു. സംവിധായകനെന്ന നിലയിൽ അദ്ദേഹം പ്രവർത്തിക്കുന്ന രീതിയും കാര്യങ്ങൾ വിശദീകരിക്കുന്ന വിധവും നയൻതാരയുടെ ശ്രദ്ധയാകർഷിച്ചു.

ചിത്രീകരണത്തിന് ശേഷം നയൻതാര വിഘ്നേഷിന് ഒരു സന്ദേശം അയച്ചു: “എനിക്ക് ഈ സെറ്റ് മിസ് ചെയ്യും”. അതിന് വിഘ്നേഷ് “എനിക്കും അതേ അനുഭവമായിരിക്കും മാഡം” എന്ന് മറുപടി നൽകി. ഏറെ നാളത്തെ പ്രണയത്തിനൊടുവിലാണ് ഇരുവരും വിവാഹിതരായത്. ഇപ്പോൾ അവർക്ക് രണ്ട് കുട്ടികളുമുണ്ട്. ഇരുവരും തങ്ങളുടെ വിശേഷങ്ങൾ സമൂഹ മാധ്യമങ്ങളിൽ പങ്കുവയ്ക്കാറുമുണ്ട്. ഡോക്യുമെന്ററിയുടെ ടീസർ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.