Naveen Babu Case: High Court Demands Case Diary, Family Seeks CBI Probe

മുൻ കണ്ണൂർ എഡിഎം കെ നവീൻ ബാബുവിന്റെ മരണവുമായി ബന്ധപ്പെട്ട കേസിൽ ഹൈക്കോടതി പ്രത്യേക അന്വേഷണ സംഘത്തലവനോട് കേസ് ഡയറി ഹാജരാക്കാൻ നിർദ്ദേശിച്ചു. ഇത് ആത്മഹത്യ സംബന്ധിച്ച കേസാണോ അതോ കൊലപാതകമാണെന്നാണോ പറയുന്നതെന്ന് കോടതി ചോദിച്ചു. കൊലപാതകമാണെങ്കിൽ എന്തടിസ്ഥാനത്തിലാണെന്നും കോടതി ആരാഞ്ഞു. മരണത്തിൽ സിബിഐ അന്വേഷണം ആവശ്യപ്പെട്ടുകൊണ്ടുള്ള കുടുംബത്തിന്റെ ഹർജിയിൽ വാദം ഡിസംബർ 6 ന് കോടതി പരിഗണിക്കും.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

നവീൻ ബാബുവിന്റെ ഭാര്യ മഞ്ജുഷയുടെ ഹർജിയിൽ, പ്രത്യേക അന്വേഷണ സംഘം പേരിന് മാത്രമാണെന്നും അന്വേഷണത്തിൽ തൃപ്തിയില്ലെന്നും വ്യക്തമാക്കിയിട്ടുണ്ട്. നീതി ലഭിക്കാൻ സിബിഐ അന്വേഷണം വേണമെന്നാണ് ആവശ്യം. പൊലീസ് അന്വേഷണത്തിലെ പോരായ്മകൾ ചൂണ്ടിക്കാണിക്കുന്ന ഹർജിയിൽ, നവീൻ ബാബുവിന്റെ മരണം കൊലപാതകമാണോ എന്ന് സംശയിക്കുന്നതായും കുടുംബം വ്യക്തമാക്കി. പ്രതികളുടെ രാഷ്ട്രീയ സ്വാധീനവും കേസ് അട്ടിമറിക്കപ്പെടാനുള്ള സാധ്യതയും ഹർജിയിൽ ചൂണ്ടിക്കാണിക്കുന്നു.

കണ്ണൂർ കളക്ടർ അരുൺ കെ വിജയനെതിരെ ഗുരുതര ആരോപണങ്ങളാണ് ഹർജിയിലുള്ളത്. കുറ്റകൃത്യത്തിലും ഗൂഢാലോചനയിലും കളക്ടറുടെ പങ്ക് അന്വേഷിക്കണമെന്നാണ് ആവശ്യം. നവീൻ ബാബുവിന്റെ ആത്മഹത്യാക്കുറിപ്പ് കണ്ടെത്തണമെന്നും, ഒന്നുകിൽ കൊലപാതകം അല്ലെങ്കിൽ ആത്മഹത്യാക്കുറിപ്പ് പൊലീസ് മുക്കിയതാകാമെന്നും ഹർജിയിൽ പറയുന്നു. കളക്ടർ ജില്ലാ പഞ്ചായത്ത് പ്രസിഡന്റിന്റെ സ്വാധീനത്തിലാണെന്നും, പ്രതിയെ രക്ഷപ്പെടുത്താൻ ശ്രമിച്ചതായും കുടുംബം ആരോപിക്കുന്നു. പി പി ദിവ്യയും കളക്ടറും തമ്മിലുള്ള അവിശുദ്ധബന്ധം സിബിഐ അന്വേഷിക്കണമെന്നും കുടുംബം ആവശ്യപ്പെടുന്നു.