NASA's Parker Solar Probe Makes Historic Close Approach to Sun

സൂര്യനെ കുറിച്ച് കൂടുതൽ അറിയാനുള്ള നാസയുടെ അതിസാഹസിക ദൗത്യം വിജയകരമായി പുരോഗമിക്കുന്നു. നാസയുടെ പാർക്കർ സോളാർ പ്രോബ് സൂര്യന്റെ തൊട്ടരികിലൂടെ സഞ്ചരിച്ച് ചരിത്രം കുറിച്ചിരിക്കുകയാണ്. ഡിസംബർ 24-ന് പേടകം സൂര്യനിൽ നിന്ന് വെറും 6.1 ദശലക്ഷം കിലോമീറ്റർ അകലെ എത്തി. മനുഷ്യനിർമിതമായ ഒരു വസ്തു ഇത്രയും അടുത്ത് സൂര്യനെ സമീപിക്കുന്നത് ഇതാദ്യമായാണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഭൂമിക്ക് ഏറ്റവും അടുത്ത നക്ഷത്രമായ സൂര്യനെക്കുറിച്ച് കൂടുതൽ വിവരങ്ങൾ ശേഖരിക്കുക എന്ന ലക്ഷ്യത്തോടെയാണ് അമേരിക്കൻ ബഹിരാകാശ ഏജൻസിയായ നാസ പാർക്കർ സോളാർ പ്രോബിനെ വിക്ഷേപിച്ചത്. സൂര്യന്റെ അടുത്തെത്തിയ ശേഷവും പേടകം സിഗ്നലുകൾ ഭൂമിയിലേക്ക് അയച്ചുകൊണ്ടിരിക്കുന്നുവെന്നും അത് പൂർണമായും പ്രവർത്തനക്ഷമമാണെന്നതിന്റെ തെളിവാണെന്നും നാസ വ്യക്തമാക്കി.

വ്യാഴാഴ്ച രാത്രി ജോൺ ഹോപ്കിൻസ് അപ്ലൈഡ് ഫിസിക്സ് ലബോറട്ടറിയിലേക്ക് പാർക്കറിൽ നിന്നുള്ള ബീക്കൺ സിഗ്നൽ ലഭിച്ചു. ജനുവരി ഒന്നോടെ പേടകത്തിൽ നിന്നുള്ള വിശദമായ വിവരങ്ങൾ ഭൂമിയിലേക്ക് എത്തുമെന്നാണ് പ്രതീക്ഷിക്കുന്നത്. സൂര്യനിൽ വസ്തുക്കൾ എങ്ങനെയാണ് ദശലക്ഷക്കണക്കിന് ഡിഗ്രിയിൽ ചൂടാകുന്നത്, സൗരവാതങ്ങളുടെ ഉത്ഭവം, ഊർജകണങ്ങൾക്ക് പ്രകാശവേഗം കൈവരുന്നതെങ്ങനെ തുടങ്ങിയ ചോദ്യങ്ങൾക്ക് ഉത്തരം നൽകാൻ പാർക്കർ പ്രോബിന് കഴിയുമെന്നാണ് ശാസ്ത്രലോകം പ്രതീക്ഷിക്കുന്നത്. മണിക്കൂറിൽ 692,000 കിലോമീറ്റർ വേഗതയിലാണ് പാർക്കർ പ്രോബിന്റെ സഞ്ചാരം. ഈ അതിവേഗ സഞ്ചാരത്തിലൂടെ സൂര്യനെക്കുറിച്ചുള്ള നമ്മുടെ അറിവ് വർധിപ്പിക്കാൻ കഴിയുമെന്ന് ശാസ്ത്രജ്ഞർ പ്രതീക്ഷിക്കുന്നു.