കുൽഗാമിൽ നിന്നുള്ള മുതിർന്ന സിപിഐഎം നേതാവ് മുഹമ്മദ് യൂസഫ് തരിഗാമി തെക്കൻ കശ്മീരിൽ ചെങ്കൊടി പാറിക്കാൻ കനൽത്തരിയായി മാറിയിരിക്കുകയാണ്. കോൺഗ്രസ് – നാഷണൽ കോൺഫറൻസ് സഖ്യത്തിന്റെ ഭാഗമായി മത്സരിക്കുന്ന 73 കാരനായ തരിഗാമി, ജമാഅത്ത് പിന്തുണയുള്ള സ്വതന്ത്ര സ്ഥാനാർത്ഥി സയ്യർ അഹമ്മദ് റഷിയെയും പി.ഡി.പി സ്ഥാനാർത്ഥി മുഹമ്മദ് അമീൻ ദറിനെയും കനൽച്ചൂടിൽ പൊള്ളിക്കുകയാണ്.
1967-ൽ രാഷ്ട്രീയ രംഗത്തേക്ക് കടന്നുവന്ന തരിഗാമി, കുൽഗാം മേഖലയിലെ പ്രമുഖ നേതാക്കളിൽ ഒരാളായി മാറി. 1996 മുതൽ നാലു തവണ മണ്ഡലത്തെ പ്രതിനിധീകരിച്ചിട്ടുള്ള അദ്ദേഹം, സിപിഐഎമ്മിന്റെ കേന്ദ്ര കമ്മറ്റിയംഗവും ഗുപ്കാർ മൂവ്മെന്റിന്റെ വക്താവുമാണ്. കശ്മീരിന്റെ പ്രത്യേക അധികാരം റദ്ദാക്കിയതുൾപ്പെടെ നിരവധി വിഷയങ്ങളിൽ അദ്ദേഹം ഇടപെട്ടിട്ടുണ്ട്.
ജമ്മു കശ്മീർ നിയമസഭാ തെരഞ്ഞെടുപ്പിൽ ബി.ജെ.പി കശ്മീർ ജമാഅത്തെ ഇസ്ലാമിയുമായി സഖ്യമുണ്ടാക്കിയതായി തരിഗാമി ആരോപിച്ചിരുന്നു. സി.പി.ഐ.എമ്മിനെ തോൽപ്പിക്കാനുള്ള നിഴൽ സഖ്യത്തിന്റെ രൂപീകരണമാണ് കശ്മീരിൽ കണ്ടതെന്നും അദ്ദേഹം പറഞ്ഞു. തരിഗാമി വിജയിച്ചാൽ ബിജെപിക്ക് വൻ തിരിച്ചടിയാകുമെന്നും വിലയിരുത്തപ്പെടുന്നു.
Story Highlights: Left leader MY Tarigami leads from Kulgam constituency in Kashmir elections
