MV Govindan rejects CBI probe demand in Naveen Babu case

സിപിഐഎം സംസ്ഥാന സെക്രട്ടറി എം വി ഗോവിന്ദൻ എഡിഎം കെ നവീൻ ബാബുവിൻ്റെ മരണത്തിൽ സിബിഐ അന്വേഷണം വേണമെന്ന കുടുംബത്തിന്റെ ആവശ്യം തള്ളിക്കളഞ്ഞു. സിബിഐയെ കൂട്ടിലടിച്ച തത്തയെന്ന് വിമർശിച്ച അദ്ദേഹം, സിബിഐ അന്വേഷണം അവസാന അന്വേഷണമല്ലെന്നും പറഞ്ഞു. കോടതി കേസ് ഡയറി പരിശോധിച്ച് വിഷയത്തിൽ തീരുമാനമെടുക്കട്ടെയെന്നും അദ്ദേഹം കൂട്ടിച്ചേർത്തു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

സിബിഐ അന്വേഷണത്തെക്കുറിച്ച് സിപിഐഎമ്മിന് വ്യക്തമായ നിലപാടുണ്ടെന്ന് എംവി ഗോവിന്ദൻ വ്യക്തമാക്കി. നവീൻ ബാബുവിൻ്റെ കുടുംബത്തിനൊപ്പമാണ് സിപിഐഎമ്മെന്ന് അദ്ദേഹം ആവർത്തിച്ചു. സിബിഐ അന്വേഷണമാണ് എല്ലാത്തിന്റേയും അവസാനമെന്ന വാദം ഒരിക്കലും അംഗീകരിക്കില്ലെന്നും അദ്ദേഹം പറഞ്ഞു. കേന്ദ്ര സർക്കാരിന്റെ താൽപര്യങ്ങൾക്കനുസരിച്ച് കാര്യങ്ങൾ നീക്കുന്നതാണ് സിബിഐയെന്നും, അതിന്റെ ഭാഗമാണ് ഇഡിയും ഐടിയുമെന്നും അദ്ദേഹം കൂട്ടിച്ചേർത്തു.

നവീൻ ബാബുവിന്റെ മരണത്തിൽ സിബിഐ അന്വേഷണം ആവശ്യപ്പെട്ടുള്ള ഹർജിയിൽ സർക്കാരിനോടും സിബിഐയോടും ഹൈക്കോടതി നിലപാട് തേടിയിരുന്നു. ആത്മഹത്യയല്ല കൊലപാതകമെന്ന് സംശയമുണ്ടെന്ന് നവീൻ ബാബുവിന്റെ കുടുംബം ആരോപിച്ചു. പ്രത്യേക സംഘത്തിന്റെ അന്വേഷണം പേരിന് മാത്രമാണെന്നും പ്രതി രാഷ്ട്രീയ സ്വാധീനമുള്ള ആളാണെന്നും നവീൻ ബാബുവിന്റെ ഭാര്യ മഞ്ജുഷ ആരോപിച്ചു. എസ്ഐടി അന്വേഷണം പൂർത്തിയാക്കിയ ശേഷം കുറ്റപത്രം നൽകിയാൽ സിബിഐ അന്വേഷണത്തിന് ഉത്തരവിടാനാകുമെന്ന് ഹൈക്കോടതി വ്യക്തമാക്കിയിരുന്നു.