സിപിഐഎമ്മിനെതിരെ കടുത്ത വിമർശനവുമായി മുസ്ലിം ലീഗ് മുഖപത്രമായ ചന്ദ്രിക രംഗത്തെത്തി. തുടർച്ചയായ രണ്ടാം ദിവസമാണ് മുഖപ്രസംഗത്തിലൂടെ വിമർശനം ഉന്നയിക്കുന്നത്. സിപിഐഎം വർഗീയതയുടെ കാളിയൻമാരായി മാറിയെന്നാണ് ചന്ദ്രികയുടെ വിമർശനം. നെറികേടിനെതിരെയുള്ള മതേതര കേരളത്തിന്റെ പ്രതികരണം ഇന്ന് പാലക്കാട് ഉപതെരഞ്ഞെടുപ്പിൽ വിനിയോഗിക്കുമെന്നും മുഖപത്രം ചൂണ്ടിക്കാട്ടി.
പാലക്കാട് വർഗീയതയുടെ വിഷവിത്തുകൾ വിതറിയെന്ന് സിപിഐഎമ്മിനെതിരെ മുഖപ്രസംഗത്തിൽ വിമർശനം ഉന്നയിച്ചു. ഇന്നലത്തെ പത്രപരസ്യങ്ങൾ അതിന്റെ ഒടുവിലത്തെ ഉദാഹരണമാണെന്നും ചന്ദ്രിക വ്യക്തമാക്കി. ന്യൂനപക്ഷങ്ങളുടെ അവകാശങ്ങൾക്ക് പിണറായി സർക്കാർ കത്തി വയ്ക്കുന്നുവെന്നും, ഇതിനുള്ള തിരിച്ചടി ലോക്സഭാ തെരഞ്ഞെടുപ്പിൽ നൽകിയിട്ടും പാഠം പഠിച്ചില്ലെന്നും മുഖപത്രം കുറ്റപ്പെടുത്തി. സംഘപരിവാറിനെ നാണിപ്പിക്കുന്ന വർഗീയതയാണ് സിപിഐഎം പുറത്തെടുക്കുന്നതെന്നും ചന്ദ്രിക വിമർശിച്ചു.
അതേസമയം, സാദിഖലി തങ്ങളെ മുഖ്യമന്ത്രി ഇന്നലെയും വിമർശിച്ചിരുന്നു. രാഷ്ട്രീയ പാർട്ടി നേതാവ് സ്വീകരിക്കേണ്ട നിലപാടല്ല സാദിഖലി തങ്ങൾ സ്വീകരിച്ചതെന്ന് മുഖ്യമന്ത്രി പറഞ്ഞു. സാദിഖലിയെ കുറിച്ച് പറയരുതെന്ന് ലീഗ് നേതാക്കൾ പറഞ്ഞാൽ നാട് അംഗീകരിക്കുമോയെന്നും അദ്ദേഹം ചോദിച്ചു. മുസ്ലിം ലീഗ് ജമാഅത്തെ ഇസ്ലാമിയും എസ്ഡിപിഐയും സ്വീകരിക്കുന്ന തീവ്രവാദ നിലപാടിനോട് സമരസപ്പെട്ടുവെന്നും മുഖ്യമന്ത്രി കുറ്റപ്പെടുത്തി.
Story Highlights: Muslim League’s mouthpiece Chandrika criticizes CPIM for communalism in Palakkad by-election
