എംജിയുടെ അതിവേഗ ഇലക്ട്രിക് കാറായ സൈബർസ്റ്റർ ഇന്ത്യൻ വിപണിയിലേക്ക് എത്തുന്നു. അടുത്ത വർഷം ഇന്ത്യയിൽ അവതരിപ്പിക്കാനുള്ള തീരുമാനം കമ്പനി കൈക്കൊണ്ടിരിക്കുകയാണ്. എംജി സെലക്റ്റ് എന്ന പുതിയ പ്രീമിയം റീട്ടെയിൽ ചാനലിലൂടെയാകും സൈബർസ്റ്റാർ വിപണിയിലെത്തുക. 2025-ൽ നടക്കുന്ന ഭാരത് മൊബിലിറ്റി എക്സ്പോയിൽ ഈ വാഹനം ഔദ്യോഗികമായി പ്രദർശിപ്പിക്കും.
സൈബർസ്റ്റാർ പദ്ധതി 2021-ൽ ആരംഭിച്ചെങ്കിലും 2023-ൽ ഇംഗ്ലണ്ടിലെ ഗുഡ് വുഡ് ഫെസ്റ്റിവൽ ഓഫ് സ്പീഡിലാണ് ആദ്യമായി അവതരിപ്പിച്ചത്. 4,533 മില്ലീമീറ്റർ നീളവും 1,912 മില്ലീമീറ്റർ വീതിയും 1,328 മില്ലീമീറ്റർ ഉയരവുമുള്ള ഈ വാഹനത്തിന് 2,689 മില്ലീമീറ്റർ വീൽബേസ് ഉണ്ട്. സ്ലീക്ക് എൽ.ഇ.ഡി ഹെഡ്‌ലാമ്പുകൾ, ഡി.ആർ.എൽ, സ്പ്ലിറ്റഡ് എയർ ഇൻടേക്ക് എന്നിവ മുൻഭാഗത്തെ ആകർഷകമാക്കുന്നു.
സൈബർസ്റ്റാറിന് രണ്ട് പവർട്രെയിൻ ഓപ്ഷനുകൾ ഉണ്ടാകും. എൻട്രി ലെവൽ മോഡലിൽ 308 എച്ച്പി മോട്ടോറും 64kWh ബാറ്ററിയും ഉൾപ്പെടുന്നു. ഒറ്റ ചാർജിൽ 520 കിലോമീറ്റർ വരെ സഞ്ചരിക്കാൻ കഴിയുന്ന ഈ വാഹനം പൂജ്യത്തിൽ നിന്ന് 100 കിലോമീറ്റർ വേഗതയിലേക്ക് കേവലം 3.2 സെക്കൻഡിൽ എത്തും. ഓൾ വീൽ ഡ്രൈവ് സംവിധാനവും ലഭ്യമാണ്. 50 ലക്ഷം മുതൽ 60 ലക്ഷം രൂപ വരെ എക്സ്-ഷോറൂം വിലയിൽ സൈബർസ്റ്റാർ ലഭ്യമാകുമെന്നാണ് പ്രതീക്ഷിക്കുന്നത്.
എംജി മോട്ടോർ ഇന്ത്യയിൽ ആരംഭിക്കുന്ന പുതിയ പ്രീമിയം ഡീലർഷിപ്പ് ശൃംഖലയായ എംജി സെലക്റ്റിലൂടെ വിൽക്കുന്ന ആദ്യ വാഹനമായിരിക്കും സൈബർസ്റ്റാർ. പ്രാരംഭഘട്ടത്തിൽ രാജ്യത്തുടനീളം 12 എക്സ്പീരിയൻസ് സെന്ററുകൾ സ്ഥാപിക്കാനാണ് കമ്പനി ലക്ഷ്യമിടുന്നത്. ഇതിലൂടെ ഉപഭോക്താക്കൾക്ക് മികച്ച സേവനവും അനുഭവവും നൽകാൻ കഴിയുമെന്ന് എംജി പ്രതീക്ഷിക്കുന്നു.
Story Highlights: MG’s high-speed electric car Cyberster set to enter Indian market next year
