ചൊവ്വയിൽ നിന്നുമെത്തിയ ഉൽക്കാശില ലേലത്തിന്; വില 34 കോടി രൂപ

ചൊവ്വയിൽ നിന്നുള്ള ഉൽക്കാശില ലേലത്തിന് വെക്കുന്നു. ചിന്നഗ്രഹവുമായുള്ള കൂട്ടിയിടിയുടെ ഫലമായി ചൊവ്വയിൽ നിന്ന് വേർപെട്ട് ഭൂമിയിൽ എത്തിയ ഉൽക്കാശിലയാണ് ഇപ്പോൾ ലേലത്തിന് എത്തുന്നത്. ജൂലൈ 16-നാണ് ലേലം നടക്കുന്നത്.

ഏകദേശം 34 കോടി രൂപയാണ് (4 മില്യൺ യുഎസ് ഡോളർ) ഇതിന് വിലമതിക്കുന്നത്. 2023 നവംബറിൽ നൈജറിലെ അഗാഡെസ് മേഖലയിൽ നിന്നാണ് ഈ ഉൽക്കാശില കണ്ടെത്തിയത്. NWA 16788 എന്നാണ് ഈ ഉൽക്കാശിലക്ക് പേര് നൽകിയിരിക്കുന്നത്. മുമ്പ് മാലിയിൽ നിന്നും കണ്ടെത്തിയ ചൊവ്വയുടെ ഉൽക്കാശില ടാഡെന്നി 002 നെക്കാൾ 70 ശതമാനം വലുതാണ് NWA 16788. ഭൂമിയിൽ കണ്ടെത്തിയിട്ടുള്ളതിൽ വെച്ച് ഏറ്റവും വലിയ ചൊവ്വയുടെ ഉൽക്കാശിലകൂടിയാണ് ഇത്. ശാസ്ത്രീയപരമായ വിശകലനത്തിലൂടെ ഈ ശിലയുടെ ഉത്ഭവം സ്ഥിരീകരിച്ചിട്ടുണ്ട്. ചൊവ്വയുടെ മാഗ്മയുടെ സാവധാനത്തിലുള്ള തണുക്കലിൽ നിന്നാണ് NWA 16788 രൂപപ്പെട്ടതെന്നാണ് ശാസ്ത്രലോകം വിലയിരുത്തുന്നത്. ഷാങ്ഹായ് അസ്ട്രോണമി മ്യൂസിയമാണ് ശിലയുടെ ഉത്ഭവം സ്ഥിരീകരിച്ചത്. ചൊവ്വയുടെ സവിശേഷമായ ചുവപ്പുകലർന്ന തവിട്ട് നിറമാണ് ഈ ശിലയുടെ ഉപരിതലത്തിന് നൽകിയിട്ടുള്ളത്. ശാസ്ത്രലോകത്തിന് ഉപകാരപ്പെടുന്ന ഈ ശില ലേലത്തിന് വെക്കുന്നതിനെക്കുറിച്ച് പല വ്യത്യസ്ത അഭിപ്രായങ്ങളും ഉയരുന്നുണ്ട്. 2021-ൽ മാലിയിൽ നിന്നും കണ്ടെത്തിയ ഉൽക്കാശിലയ്ക്ക് ടാഡെന്നി 002 എന്നാണ് പേര് നൽകിയിരുന്നത്. ഇത്തരം അപൂർവമായ വസ്തുക്കൾ സ്വകാര്യ ശേഖരത്തിൽ സൂക്ഷിക്കുന്നതിന് പകരം പൊതുജനങ്ങൾക്ക് പഠിക്കുവാനും ആസ്വദിക്കുവാനുമായി മ്യൂസിയത്തിൽ സൂക്ഷിക്കണം എന്നാണ് പലരുടെയും അഭിപ്രായം. ജൂലൈ 16-നാണ് ലേലം നടത്താൻ തീരുമാനിച്ചിരിക്കുന്നത്. Story Highlights: ചൊവ്വയിൽ നിന്നും ഭൂമിയിലെത്തിയ NWA 16788 എന്ന ഉൽക്കാശില 34 കോടി രൂപയ്ക്ക് ലേലത്തിന്.