സംസ്ഥാന സ്‌കൂള്‍ കായിക മേളയുടെ അത്ലറ്റിക്സ് വിഭാഗത്തില്‍ മലപ്പുറത്തിന് ആദ്യമായി കിരീടം ലഭിച്ചു. 66 വർഷത്തിനുശേഷമാണ് മലപ്പുറം ഈ നേട്ടം കൈവരിച്ചത്. നാല് മത്സരങ്ങൾ കൂടി ബാക്കിനില്‍ക്കെ 231 പോയിന്റ് നേടിയതോടെയാണ് മലപ്പുറം കിരീടം ഉറപ്പിച്ചത്. പാലക്കാട് രണ്ടാം സ്ഥാനത്ത് നിലകൊള്ളുന്നു.
എറണാകുളം മഹാരാജാസ് ഗ്രൗണ്ടില്‍ വൈകിട്ട് നാലിന് നടക്കുന്ന സമാപന സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. മന്ത്രി വി ശിവന്‍ കുട്ടി അധ്യക്ഷത വഹിക്കും. നടന്‍ വിനായകനും ഫുട്‌ബോള്‍ താരം ഐഎം വിജയനും പരിപാടിയില്‍ പങ്കെടുക്കും.
ഗെയിംസ് വിഭാഗത്തിൽ 1,213 പോയിൻ്റുമായി തിരുവനന്തപുരം കിരീടം നേടിയിരുന്നു. ഓവറോൾ ചാംപ്യൻഷിപ്പിൽ 1,926 പോയിന്റുമായി തിരുവനന്തപുരം മേളയിലെ ചാംപ്യൻമാരായി. 845 പോയിൻ്റുമായി തൃശ്ശൂർ രണ്ടാം സ്ഥാനത്തും 769 പോയിൻ്റുമായി മലപ്പുറം മൂന്നാം സ്ഥാനത്തുമാണ്. അത്ലറ്റിക്സ് ആൻഡ് ഗെയിംസ് വിഭാഗങ്ങളിൽ തിരുവനന്തപുരം ജില്ല മറ്റ് ജില്ലകളെ അപേക്ഷിച്ച് ബഹുദൂരം മുന്നിലാണ്.
Story Highlights: Malappuram wins first athletics title in 66 years at State School Sports Meet, Thiruvananthapuram leads overall championship
