പാലക്കാട് എൽഡിഎഫ് സ്ഥാനാർത്ഥി ഡോ. പി സരിൻ സമസ്ത അധ്യക്ഷൻ ജിഫ്രി മുത്തുക്കോയ തങ്ങളുമായി കോഴിക്കോട്ട് കൂടിക്കാഴ്ച നടത്തി. മാധ്യമങ്ങളെ ഒഴിവാക്കിയായിരുന്നു ഈ കൂടിക്കാഴ്ച. സരിൻ സമസ്തയുടെ പിന്തുണ അഭ്യർത്ഥിക്കുകയും, ജിഫ്രി തങ്ങൾ വിജയാശംസകൾ നേരുകയും ചെയ്തതായി സരിൻ വ്യക്തമാക്കി. കൂടിക്കാഴ്ച സന്തോഷകരമായിരുന്നുവെന്നും അദ്ദേഹം പറഞ്ഞു.
അതേസമയം, പാണക്കാട് തങ്ങൾക്കെതിരായ പരാമർശത്തിൽ സമസ്തയിൽ ഭിന്നത രൂക്ഷമാകുന്നു. ഉമർ ഫൈസി മുക്കത്തിനെതിരെ മുസ്ലിം ലീഗ് അനുകൂലികളുടെ പരസ്യ നീക്കമുണ്ടായി. സമസ്തയുടേയും മുസ്ലീം ലീഗിന്റേയും നേതാവ് ജബ്ബാർ ഹാജി, ഉമർ ഫൈസി മുക്കത്തെ സമസ്തയിൽ നിന്ന് പുറത്താക്കണമെന്ന് ആവശ്യപ്പെട്ടു.
ഉമർ ഫൈസിയെ പണ്ഡിത സഭയായ മുശാവറയിൽ നിന്നു നീക്കണമെന്നും ജബ്ബാർ ഹാജി ആവശ്യപ്പെട്ടു. ഉമർ ഫൈസിയുടെ നീക്കം സമസ്തയിലെ ഐക്യ ചർച്ച പൊളിക്കലാണെന്നും, വിവാദ പരാമർശം പാണക്കാട് തങ്ങളെ വേദനിപ്പിച്ചുവെന്നും അദ്ദേഹം വ്യക്തമാക്കി. സർക്കാരിനെ പ്രീതിപ്പെടുത്തി ഹജ്ജ് കമ്മറ്റി ചെയർമാൻ സ്ഥാനം നേടാനുള്ള ശ്രമമാണിതെന്നും, അത് സമസ്തയുടെ ചിലവിൽ വേണ്ടെന്നും ജബ്ബാർ ഹാജി കൂട്ടിച്ചേർത്തു.
Story Highlights: LDF candidate P Sarin meets Samastha leader Jifri Muthukoya amid growing tensions within Samastha over controversial remarks
