മലപ്പുറം ജില്ലയെ മുഖ്യമന്ത്രി അപമാനിച്ചുവെന്ന ആരോപണവുമായി പ്രതിപക്ഷം നിയമസഭയിൽ കൊണ്ടുവന്ന അടിയന്തര പ്രമേയം ചർച്ചയ്ക്കെടുക്കാൻ മുഖ്യമന്ത്രി സമ്മതിച്ചതോടെ യുഡിഎഫ് വെട്ടിലായി. തുടർന്ന് പ്രതിപക്ഷം സഭയിൽ നിന്ന് ഇറങ്ങിപ്പോയതിനെ കുറിച്ച് കെ.ടി. ജലീൽ എംഎൽഎ ഫേസ്ബുക്കിലൂടെ വിമർശനം ഉന്നയിച്ചു. കള്ളി പൊളിയുമെന്ന് വന്നപ്പോൾ പ്രതിപക്ഷം നിയമസഭയിൽ നിന്ന് വാലും ചുരുട്ടി ഓടിയെന്നാണ് ജലീലിന്റെ വിമർശനം.
സഭ സാധാരണ ഗതിയിൽ നടന്നിരുന്നെങ്കിൽ ഉച്ചയ്ക്ക് 12 മണിയോടെ യുഡിഎഫിന്റെ പതിനാറടിയന്തിരം കഴിയുമെന്ന ഭയത്താലാണ് അവർ സഭ അലങ്കോലപ്പെടുത്തി സമ്മേളനം തടസ്സപ്പെടുത്തിയതെന്ന് ജലീൽ ആരോപിച്ചു. കഴിഞ്ഞ പത്തുവർഷമായി ജില്ലയിൽ പിടികൂടിയ സ്വർണ്ണവും ഹവാല പണവും എത്രയെന്നും അതിലെ പ്രതികളുടെ രാഷ്ട്രീയ ബന്ധവും എണ്ണിയെണ്ണിപ്പറഞ്ഞ് പ്രതിപക്ഷത്തെ തേച്ചൊട്ടിക്കാനുള്ള അവസരമാണ് തനിക്കു നഷ്ടമായതെന്നും അദ്ദേഹം കുറിച്ചു.
ഇതേ പ്രമേയം നാളെ അടിയന്തിര പ്രമേയമായി കൊണ്ടുവരാനും ചർച്ച ചെയ്യാനും പ്രതിപക്ഷത്തിന് ധൈര്യമുണ്ടോയെന്ന് ജലീൽ ചോദിച്ചു. യുഡിഎഫ് നേതാക്കളുടെ സ്വർണ്ണക്കടത്തും ഹവാല ബന്ധവും തുറന്നുകാട്ടപ്പെടുമായിരുന്ന ഇന്നത്തെ സഭ കലക്കി രക്ഷപ്പെടാമെന്ന് ആരും കരുതേണ്ടെന്നും അദ്ദേഹം പറഞ്ഞു. പ്രതിപക്ഷം നടത്തിയത് ചർച്ച ഒഴിവാക്കാനുള്ള പൊറാട്ടുനാടകമാണെന്നും ജലീൽ വിമർശിച്ചു.
Story Highlights: K T Jaleel criticizes opposition for walking out of assembly debate on Malappuram issue
