സംസ്ഥാന സ്കൂൾ കായികമേളയിലെ അനിഷ്ട സംഭവങ്ങളുടെ പശ്ചാത്തലത്തിൽ രണ്ട് സ്കൂളുകൾക്കെതിരെ ഏർപ്പെടുത്തിയിരുന്ന വിലക്ക് പിൻവലിച്ചതായി വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. മലപ്പുറം നാവാമുകുന്ദ സ്കൂളും എറണാകുളം കോതമംഗലം മാർ ബേസിൽ സ്കൂളുമാണ് ഖേദപ്രകടനം നടത്തിയതിനെ തുടർന്ന് വിലക്ക് നീക്കിയത്. 2024 നവംബർ 8 മുതൽ 11 വരെ എറണാകുളത്ത് നടന്ന സംസ്ഥാന സ്കൂൾ കായികമേളയുടെ സമാപന ചടങ്ങിലാണ് അനിഷ്ട സംഭവങ്ങൾ അരങ്ങേറിയത്. മേലിൽ ഇത്തരം സംഭവങ്ങൾ ആവർത്തിക്കില്ലെന്ന് ഉറപ്പ് നൽകി സ്കൂൾ അധികൃതർ കത്തു നൽകിയതായി മന്ത്രി നിയമസഭയിൽ അറിയിച്ചു.
ആൻറണി ജോൺ എംഎൽഎയുടെ സബ്മിഷന് മറുപടി നൽകുകയായിരുന്നു മന്ത്രി. വിലക്ക് പിൻവലിക്കാനുള്ള ഉത്തരവ് ഒരാഴ്ചയ്ക്കകം പുറത്തിറങ്ങുമെന്നും മന്ത്രി വ്യക്തമാക്കി. മുഖ്യമന്ത്രിയുടെയും സ്പീക്കറുടെയും പ്രതിപക്ഷ നേതാവിന്റെയും കായിക മന്ത്രിയുടെയും ഇടപെടലിനെ തുടർന്നാണ് തീരുമാനം. കെ.എസ്.റ്റി.എ., പി.ജി.റ്റി.എ., ഡി.വൈ.എഫ്.ഐ, എസ്.എഫ്.ഐ, കെ.എസ്.യു. തുടങ്ങിയ സംഘടനകളും കുട്ടികളുടെ ഭാവി കണക്കിലെടുത്ത് നടപടി സ്വീകരിക്കണമെന്ന് ആവശ്യപ്പെട്ടിരുന്നു.
എന്നാൽ, സംഭവത്തിൽ പങ്കുണ്ടെന്ന് കണ്ടെത്തിയ അധ്യാപകർക്കെതിരായ നടപടി തുടരുമെന്ന് മന്ത്രി വ്യക്തമാക്കി. നിയമവിരുദ്ധ പ്രവർത്തനങ്ങൾക്ക് നേതൃത്വം നൽകിയ അധ്യാപകർ ഇതുവരെ ഖേദപ്രകടനം നടത്തിയിട്ടില്ല. അന്വേഷണ കമ്മീഷന്റെ റിപ്പോർട്ടിന്റെ അടിസ്ഥാനത്തിൽ പ്രിൻസിപ്പൽ സെക്രട്ടറിയാണ് അധ്യാപകർക്കെതിരായ നടപടി പുനഃപരിശോധിക്കുക. പ്രിൻസിപ്പൽ സെക്രട്ടറിയുടെ റിപ്പോർട്ട് ലഭിച്ച ശേഷം തുടർ നടപടികൾ സ്വീകരിക്കും. 2025-26 അധ്യയന വർഷത്തെ സ്കൂൾ കായികമേളയിൽ പങ്കെടുക്കുന്നതിൽ നിന്ന് രണ്ട് സ്കൂളുകളെയും 2025 ജനുവരി 2 ന് പൊതുവിദ്യാഭ്യാസ ഡയറക്ടർ വിലക്കിയിരുന്നു.
ദേശീയ മത്സരങ്ങളിൽ പങ്കെടുക്കേണ്ട കായിക പ്രതിഭകളെ ബാധിക്കുന്ന തരത്തിലുള്ള നടപടി ഒഴിവാക്കണമെന്ന് മുഖ്യമന്ത്രി ആവശ്യപ്പെട്ടിരുന്നു. ശ്രീ. ആന്റണി ജോൺ, ശ്രീ. കുറുക്കോളി മൊയ്തീൻ, അഡ്വ. ഡീൻ കുര്യാക്കോസ് എം.പി. എന്നിവരും ഇക്കാര്യത്തിൽ ഇടപെട്ടിരുന്നു. ഈ സാഹചര്യത്തിലാണ് സ്കൂളുകൾക്കെതിരെയുള്ള വിലക്ക് പിൻവലിക്കാൻ സർക്കാർ തീരുമാനിച്ചത്. സ്കൂളുകൾ ഖേദപ്രകടനം നടത്തിയതും തീരുമാനത്തെ സ്വാധീനിച്ചു.
Story Highlights: Two schools’ ban lifted after apology for incidents at Kerala State School Sports Meet.
Related posts:
