ക്ലൂ ആപ്പ്: യാത്രക്കാർക്ക് ശുചിമുറി കണ്ടെത്താൻ പുതിയ ആപ്ലിക്കേഷനുമായി കേരള സർക്കാർ

യാത്രക്കാർക്ക് ശുചിമുറി കണ്ടെത്താൻ ഇനി ക്ലൂ ആപ്പ്. തദ്ദേശസ്വയംഭരണ വകുപ്പ് പുറത്തിറക്കുന്ന ഈ ആപ്പ്, യാത്രക്കാർക്കും പൊതുജനങ്ങൾക്കും എവിടെയും അടുത്തുള്ള ശുചിമുറി കണ്ടെത്താൻ സഹായിക്കും. മന്ത്രി എം ബി രാജേഷ് ഫേസ്ബുക്കിലാണ് ഈ വിവരങ്ങൾ പങ്കുവെച്ചത്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

കേരള ലൂ (Kerala Loo) എന്നതിൻ്റെ ചുരുക്കെഴുത്താണ് ക്ലൂ. ഈ ആപ്ലിക്കേഷൻ ആൻഡ്രോയിഡ്, ഐഒഎസ് പ്ലാറ്റ്ഫോമുകളിൽ ഉടൻ ലഭ്യമാകും. ആപ്പിലേക്ക് ഹോട്ടലുകൾ, റെസ്റ്റോറന്റുകൾ, ശുചിമുറികൾ ലഭ്യമായ മറ്റു സ്ഥാപനങ്ങൾ എന്നിവയുടെ രജിസ്ട്രേഷൻ ഈ മാസം നാളെ മുതൽ ആരംഭിക്കും.

തദ്ദേശസ്വയംഭരണ വകുപ്പിന്റെ ‘മാലിന്യമുക്തം നവകേരളം’ പദ്ധതിയുടെ ഭാഗമായി കേരള ഹോട്ടൽ & റെസ്റ്റോറൻ്റ് അസോസിയേഷനുമായി സഹകരിച്ചാണ് ശുചിത്വമിഷൻ ഈ ആശയം നടപ്പാക്കുന്നത്. റിയൽ ടൈം അപ്ഡേറ്റുകൾ, മാപ്പിൽ കൃത്യമായ സ്ഥലവിവരങ്ങൾ, ശുചിമുറികൾ ലഭ്യമായ സ്ഥാപനങ്ങളുടെ പ്രവർത്തനസമയം എന്നിവ ആപ്പിൽ ലഭ്യമാകും. കൂടാതെ, ശുചിമുറിയുടെ റേറ്റിംഗ് രേഖപ്പെടുത്താനുള്ള സൗകര്യവും ഉപയോക്താക്കൾക്ക് ഉണ്ടാകും.

സ്വകാര്യസ്ഥാപനങ്ങൾ നൽകുന്ന സേവനങ്ങൾ, റെസ്റ്റോറന്റുകളിലെ പ്രധാന വിഭവങ്ങൾ, മറ്റ് ഭക്ഷണവിഭവങ്ങൾ, സൗകര്യങ്ങൾ എന്നിവയും ആപ്പിൽ ലഭ്യമാകും. ഇത് അതത് സ്ഥാപനങ്ങൾക്ക് സഹായകരമാകും. ഫ്രൂഗൽ സൈന്റിഫിക് എന്ന സ്റ്റാർട്ടപ്പ് കമ്പനിയാണ് ആപ്പ് രൂപകൽപ്പന ചെയ്തിരിക്കുന്നത്.

ഒന്ന് മൂത്രമൊഴിക്കാൻ മുട്ടിയാൽ വൃത്തിയുള്ള ഒരിടം കണ്ടെത്താൻ ഇനി ബുദ്ധിമുട്ടേണ്ടതില്ലെന്ന് മന്ത്രി ഫേസ്ബുക്കിൽ കുറിച്ചു. ടേക്ക് എ ബ്രേക്കും പൊതുശുചിമുറികളും ഈ ആവശ്യത്തിന് പര്യാപ്തമാകില്ല. അതിനാൽ സ്വകാര്യമേഖലയിലെ ഹോട്ടലുകൾ, റെസ്റ്റോറന്റുകൾ തുടങ്ങിയ സ്ഥാപനങ്ങളിലെ ശുചിമുറികൾ കൂടി ഇതിൽ ഉൾപ്പെടുത്തും.

ഈ പദ്ധതിയിലൂടെ കേരളത്തിൽ എവിടെയും തൊട്ടടുത്തുള്ള വൃത്തിയുള്ള ശുചിമുറി കണ്ടെത്താൻ സാധിക്കും. ഇതിലൂടെ യാത്രക്കാർ അനുഭവിക്കുന്ന ബുദ്ധിമുട്ടുകൾക്ക് ഒരു പരിഹാരമാകും.

Story Highlights: Kerala’s Local Self-Government Department launches ‘Clooa’ app to help travelers find clean restrooms nearby, integrating public and private facilities.