Kerala Education Minister's Directive on Inclusive Study Tours

പണമില്ലാത്തതിനാൽ ഒരു വിദ്യാർഥിയെ പോലും പഠനയാത്രയിൽ നിന്ന് ഒഴിവാക്കരുതെന്ന് വിദ്യാഭ്യാസ മന്ത്രി വി. ശിവൻകുട്ടി കർശന നിർദേശം നൽകി. വാർത്താക്കുറിപ്പിലൂടെയാണ് മന്ത്രി ഈ നിലപാട് വ്യക്തമാക്കിയത്. നിലവിൽ സ്കൂൾ പഠനയാത്രകൾ വെറും വിനോദയാത്രകളായി മാറുന്ന പ്രവണതയും, ചില സ്കൂളുകൾ ഇതിനായി വൻ തുക ഈടാക്കുന്നതും മന്ത്രിയുടെ ശ്രദ്ധയിൽപ്പെട്ടിട്ടുണ്ട്. ഇത് സാമ്പത്തികമായി പിന്നോക്കം നിൽക്കുന്ന വിദ്യാർഥികൾക്ക് മാനസിക സമ്മർദ്ദമുണ്ടാക്കുന്നതായി മന്ത്രി ചൂണ്ടിക്കാട്ടി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

എല്ലാ കുട്ടികൾക്കും പ്രാപ്യമാകുന്ന രീതിയിൽ പഠനയാത്രകൾ സംഘടിപ്പിക്കണമെന്ന് മന്ത്രി നിർദേശിച്ചു. യാത്രയ്ക്ക് അകമ്പടി സേവിക്കുന്ന അധ്യാപകരുടെയും പി.ടി.എ. അംഗങ്ങളുടെയും യാത്രാചെലവ് ബന്ധപ്പെട്ട പി.ടി.എ. കമ്മിറ്റികളോ സ്റ്റാഫ് മാനേജ്മെന്റ് കമ്മിറ്റികളോ വഹിക്കണമെന്നും അദ്ദേഹം വ്യക്തമാക്കി. ഈ നിർദേശങ്ങൾ അടിയന്തരമായി നടപ്പിലാക്കുന്നതിനുള്ള നടപടികളെക്കുറിച്ച് ഒരാഴ്ചയ്ക്കുള്ളിൽ റിപ്പോർട്ട് സമർപ്പിക്കാൻ പൊതുവിദ്യാഭ്യാസ വകുപ്പ് ഡയറക്ടറെ ചുമതലപ്പെടുത്തി.

സ്കൂളുകളിലെ വ്യക്തിഗത ആഘോഷങ്ങളെക്കുറിച്ചും മന്ത്രി പരാമർശിച്ചു. ജീവനക്കാരുടെയും വിദ്യാർഥികളുടെയും ജന്മദിനം പോലുള്ള ആഘോഷങ്ങൾക്ക് സമ്മാനങ്ങൾ നൽകാൻ കുട്ടികൾ നിർബന്ധിതരാകുന്ന സാഹചര്യം ഒഴിവാക്കണമെന്ന് അദ്ദേഹം നിർദേശിച്ചു. സമ്മാനങ്ങൾ കൊണ്ടുവരാത്ത കുട്ടികളെ വേർതിരിച്ച് കാണുന്ന പ്രവണത ഒഴിവാക്കണമെന്നും, സാമ്പത്തിക ബാധ്യത ഉണ്ടാക്കുന്ന ഇത്തരം ആഘോഷങ്ങൾ നിരുത്സാഹപ്പെടുത്തണമെന്നും മന്ത്രി വി. ശിവൻകുട്ടി സ്കൂൾ അധികാരികൾക്ക് കർശന നിർദേശം നൽകി.