കേരള ബ്ലാസ്റ്റേഴ്സിന് ഐഎസ്എല്ലിൽ ഇന്ന് രണ്ടാം മത്സരം. കൊച്ചിയിൽ രാത്രി ഏഴരയ്ക്ക് നടക്കുന്ന മത്സരത്തിൽ ഈസ്റ്റ് ബംഗാളാണ് എതിരാളികൾ. നായകൻ അഡ്രിയാൻ ലൂണ പനി മൂലം ഇന്നും കളിക്കില്ല. എന്നാൽ, കൊച്ചിയിൽ നിന്ന് തന്നെ സീസണിലെ ആദ്യ പോയിന്റ് നേടാമെന്ന പ്രതീക്ഷയിലാണ് ബ്ലാസ്റ്റേഴ്സ്. പുതിയ സ്ട്രൈക്കർ ജെസ്യൂസ് ഹിമനെസ് ആദ്യ മത്സരത്തിലേ ഗോളടിച്ചത് ടീമിന് ആത്മവിശ്വാസം നൽകുന്നു.
ആദ്യ കളിയിൽ പഞ്ചാബിനോട് ഒന്നിനെതിരെ രണ്ട് ഗോളിന് തോറ്റ ബ്ലാസ്റ്റേഴ്സ് ഇന്ന് രണ്ടും കൽപ്പിച്ച് ഇറങ്ങും. മധ്യനിരയിൽ നായകൻ അഡ്രിയാൻ ലൂണയുടെ അഭാവവും പ്രതിരോധത്തിലെ പിഴവുകളും ആദ്യ മത്സരത്തിലെ തോൽവിക്ക് കാരണമായി. ക്വാമി പെപ്രയ്ക്ക് പകരം ജെസ്യൂസ് ഇന്ന് ആദ്യ ഇലവനിൽ എത്തുമെന്ന് പ്രതീക്ഷിക്കുന്നു.
ഈസ്റ്റ് ബംഗാൾ നിരയിൽ ബ്ലാസ്റ്റേഴ്സിന്റെ പഴയ താരങ്ങൾ നിരവധിയുണ്ട്. ദിമിത്രിയാേസ് ഡിയാമന്റക്കോസ്, ജീക്സൺ സിങ്, പ്രഭ്സുഗൻ ഗിൽ, മുഹമ്മദ് റാക്കിപ്പ് തുടങ്ങിയവർ കൊൽക്കത്തൻ നിരയിലെ പരിചിത മുഖങ്ങളാണ്. നേർക്ക് നേർ പോരാട്ടങ്ങളിൽ നേരിയ മുൻതൂക്കം ബ്ലാസ്റ്റേഴ്സിനുണ്ട്. മൂന്ന് മത്സരങ്ങളിൽ ബ്ലാസ്റ്റേഴ്സ് ജയിച്ചപ്പോൾ ഈസ്റ്റ് ബംഗാൾ രണ്ടെണ്ണത്തിൽ ജേതാക്കളായി. മൂന്ന് കളികൾ സമനിലയിലായി.
Story Highlights: Kerala Blasters face East Bengal in ISL match without captain Adrian Luna
