കണ്ണൂർ ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പ് ഇന്ന് നടക്കും. പി പി ദിവ്യ രാജിവെച്ച ഒഴിവിലേക്കാണ് തെരഞ്ഞെടുപ്പ് നടക്കുന്നത്. രാവിലെ 11 മണിക്ക് ജില്ലാ കളക്ടറുടെ മേൽനോട്ടത്തിൽ വോട്ടെടുപ്പ് നടക്കും. എൽഡിഎഫ് സ്ഥാനാർത്ഥിയായി അഡ്വ. കെ കെ രത്‌നകുമാരിയും കോൺഗ്രസ് സ്ഥാനാർത്ഥിയായി ജൂബിലി ചാക്കോയും മത്സരിക്കുന്നു.
24 അംഗ ഭരണസമിതിയിൽ 17 അംഗങ്ങൾ എൽ.ഡി.എഫും ഏഴ് അംഗങ്ങൾ യു.ഡി.എഫുമാണ്. ഇതിനാൽ അഡ്വ. കെ കെ രത്‌നകുമാരി ജില്ലാ പഞ്ചായത്ത് പ്രസിഡന്റായി തെരഞ്ഞെടുക്കപ്പെടുമെന്ന് കരുതപ്പെടുന്നു. നിയമോപദേശത്തിന്റെ ഭാഗമായി പി പി ദിവ്യ വോട്ടെടുപ്പിൽ പങ്കെടുക്കില്ലെന്നാണ് സൂചന.
നവീൻ ബാബുവിന്റെ മരണത്തിൽ ആത്മഹത്യാ പ്രേരണക്കുറ്റം ചുമത്തി കേസെടുത്തതിനെ തുടർന്നാണ് ദിവ്യ രാജിവെച്ചത്. വിവാദ യാത്രയയപ്പ് കഴിഞ്ഞ് ഒരു മാസം പൂർത്തിയാകുന്ന ദിവസം തന്നെയാണ് പുതിയ പ്രസിഡന്റ് തെരഞ്ഞെടുപ്പ് നടക്കുന്നതെന്നതും ശ്രദ്ധേയമാണ്. അതേസമയം, എഡിഎം കെ നവീൻ ബാബുവിന്റെ മരണത്തിൽ പ്രത്യേക അന്വേഷണസംഘം ഇന്ന് കുടുംബത്തിന്റെ മൊഴി രേഖപ്പെടുത്തും. മലയാലപ്പുഴയിലെ വീട്ടിലെത്തിയാണ് മൊഴി എടുക്കുക.
Story Highlights: Kannur district panchayat president election today following P P Divya’s resignation
