കാർഷിക നിയമങ്ങൾ തിരികെ കൊണ്ടുവരണമെന്ന് കങ്കണ റണാവത്; വിമർശനവുമായി പ്രതിപക്ഷം

കർഷക സമരത്തിന് കാരണമായ മൂന്ന് കാർഷിക നിയമങ്ങൾ തിരികെ കൊണ്ടുവരണമെന്ന് ബിജെപി എംപിയും നടിയുമായ കങ്കണ റണാവത് ആവശ്യപ്പെട്ടു. ഹിമാചൽ പ്രദേശിലെ മാണ്ടിയിൽ മാധ്യമപ്രവർത്തകരോട് സംസാരിക്കുകയായിരുന്നു അവർ. തൻ്റെ പ്രസ്താവന വിവാദമാകുമെന്ന് അറിഞ്ഞുകൊണ്ട് തന്നെയാണ് സംസാരിക്കുന്നതെന്നും കർഷകർ തന്നെ ഈ ആവശ്യം ഉന്നയിക്കണമെന്നും അവർ പറഞ്ഞു.

കർഷകർക്ക് ഏറെ ഗുണകരമാകുന്നതാണ് ഈ നിയമങ്ങളെന്ന് കങ്കണ അഭിപ്രായപ്പെട്ടു. രാജ്യത്തിൻ്റെ വികസനത്തിൽ കർഷകർ വലിയ പങ്കാണ് വഹിക്കുന്നതെന്നും അവരുടെ തന്നെ നന്മയ്ക്ക് മൂന്ന് നിയമങ്ങളും തിരികെ കൊണ്ടുവരണമെന്നും അവർ കൂട്ടിച്ചേർത്തു. എന്നാൽ ചില സംസ്ഥാനങ്ങളിൽ നിന്നുള്ള കർഷകരുടെ പ്രതിഷേധത്തെ തുടർന്നാണ് നിയമങ്ങൾ പിൻവലിച്ചത്.

കങ്കണയുടെ പ്രസ്താവനയ്ക്കെതിരെ കോൺഗ്രസും ആം ആദ്മി പാർട്ടിയും രംഗത്തെത്തി. മൂന്ന് കരിനിയമങ്ങൾക്കും എതിരായ സമരത്തിൽ 750 ഓളം കർഷകരാണ് രക്തസാക്ഷിത്വം വരിച്ചതെന്നും ആ നിയമങ്ങൾ തിരികെ കൊണ്ടുവരാനുള്ള ശ്രമത്തെ ശക്തമായി എതിർക്കുമെന്നും കോൺഗ്രസ് വക്താവ് സുപ്രിയ ശ്രീനതെ പറഞ്ഞു. കങ്കണ പ്രധാനമന്ത്രി നരേന്ദ്ര മോദിക്കെതിരെയാണ് നിലപാടെടുത്തതെന്ന് എഎപി എം.പി മൽവീന്ദർ സിങ് വിമർശിച്ചു. കർഷകരുടെ ആശങ്ക മനസിലായത് കൊണ്ടാണ് നിയമങ്ങൾ പിൻവലിക്കുന്നതെന്ന് പ്രധാനമന്ത്രി പറഞ്ഞിരുന്നതായും അദ്ദേഹം ചൂണ്ടിക്കാട്ടി.

Story Highlights: BJP MP Kangana Ranaut calls for reintroduction of controversial farm laws, sparking political debate