K Sudhakaran slams BJP after Kerala by-election results

കേരളത്തിലെ ഉപതെരഞ്ഞെടുപ്പ് ഫലങ്ങൾ പുറത്തുവന്നതിനു പിന്നാലെ, കെപിസിസി പ്രസിഡന്റ് കെ സുധാകരൻ ബിജെപിക്കെതിരെ രൂക്ഷ വിമർശനം ഉന്നയിച്ചു. ജനങ്ങൾ ബിജെപിയുടെ നടുവൊടിച്ചെന്നും ഇനി ഈ പാർട്ടി കേരളത്തിൽ തലപൊക്കില്ലെന്നും അദ്ദേഹം പ്രസ്താവിച്ചു. ബിജെപിയുടെ വർഗീയ പ്രചാരണത്തിനും പണക്കൊഴുപ്പിനും ഇതിലും വലിയ തിരിച്ചടി കിട്ടാനില്ലെന്നും സുധാകരൻ കൂട്ടിച്ചേർത്തു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

പാലക്കാട് പതിനായിരത്തിലധികം വോട്ടാണ് ബിജെപിക്കു നഷ്ടപ്പെട്ടതെന്നും, നഗരസഭയിലാണ് ഏറ്റവുമധികം ഇടിവുണ്ടായതെന്നും സുധാകരൻ ചൂണ്ടിക്കാട്ടി. ചേലക്കരയിലും വയനാട്ടിലും ബിജെപിക്കു നേട്ടമുണ്ടാക്കാനായില്ല. വർഗീയത വാരിവിതറിയും സമുദായങ്ങളെ തമ്മിലടിപ്പിച്ചുമാണ് ബിജെപി തെരഞ്ഞെടുപ്പ് പ്രചാരണം നടത്തിയതെന്നും, സമുന്നതരായ നേതാക്കൾവരെ പ്രചാരണത്തിനു വന്നിട്ടും പ്രയോജനമുണ്ടായില്ലെന്നും അദ്ദേഹം വ്യക്തമാക്കി.

കേരളത്തിന്റേത് മതേതര മണ്ണാണെന്ന് ബിജെപി തിരിച്ചറിയണമെന്ന് സുധാകരൻ അഭിപ്രായപ്പെട്ടു. ജാർഖണ്ഡിൽ ഇന്ത്യാ സഖ്യത്തിന് മികച്ച വിജയം നേടാനും സാധിച്ചതായി അദ്ദേഹം പറഞ്ഞു. പിണറായി സർക്കാരിനെതിരേയുള്ള ജനവികാരം ഉപതെരഞ്ഞടുപ്പിൽ ആളിക്കത്തിയതായും, പാലക്കാട് രാഹുൽ മാങ്കുട്ടത്തിൽ നേടിയ വൻഭൂരിപക്ഷം അതിന്റെ അളവുകോലാണെന്നും സുധാകരൻ വിലയിരുത്തി. ചേലക്കരയിൽ രമ്യ ഹരിദാസിനു ലീഡ് കുറയ്ക്കാൻ സാധിച്ചതും, വയനാട്ടിൽ പ്രിയങ്ക ഗാന്ധിക്കു ലഭിച്ച വൻ ഭൂരിപക്ഷവും കോൺഗ്രസിന്റെ മതേതര, ജനാധിപത്യ ആശയങ്ങൾക്കു ലഭിച്ച അംഗീകാരമാണെന്നും അദ്ദേഹം കൂട്ടിച്ചേർത്തു.