കെപിസിസി പ്രസിഡന്റ് കെ.സുധാകരൻ എംപി ആരോപിച്ചത് എഡിജിപി എംആർ അജിത്കുമാർ മുഖ്യമന്ത്രിയുടെയും സിപിഐഎമ്മിന്റെയും ഏജന്റാണെന്നാണ്. ആർഎസ്എസ് നേതൃത്വവുമായി കൂടിക്കാഴ്ച നടത്തിയ എഡിജിപിയെ കാത്തിരിക്കുന്നത് മുൻ പ്രിൻസിപ്പൽ സെക്രട്ടറി എം.ശിവശങ്കറിന്റെ ഗതിയാണെന്നും അദ്ദേഹം പറഞ്ഞു. എൽഡിഎഫ് സർക്കാർ ആർഎസ്എസിന് കീഴ്പ്പെട്ടിരിക്കുകയാണെന്നും സിപിഐഎം നേതൃത്വം ശക്തമായ നിലപാട് സ്വീകരിക്കണമെന്നും സുധാകരൻ ആവശ്യപ്പെട്ടു.
എഡിജിപി എംആർ അജിത്കുമാർ ആർഎസ്എസ് നേതൃത്വവുമായി കൂടിക്കാഴ്ച നടത്തിയെന്ന് സമ്മതിച്ചതായി അറിയാൻ കഴിഞ്ഞു. സ്പെഷ്യൽ ബ്രാഞ്ച് ഈ കൂടിക്കാഴ്ച നടന്ന തൊട്ടടുത്ത ദിവസം തന്നെ റിപ്പോർട്ട് ചെയ്തിട്ടും നാളിതുവരെ എഡിജിപിക്കെതിരെ മുഖ്യമന്ത്രി നടപടിയെടുത്തില്ല. തലസ്ഥാനത്ത് വെച്ച് ആർഎസ്എസ് നേതാവ് റാം മാധവിനേയും എഡിജിപി കണ്ടിരുന്നു. മുഖ്യമന്ത്രിക്കെതിരായ കേന്ദ്ര ഏജൻസികളുടെ അന്വേഷണം നിർജ്ജീവമാക്കാനുള്ള ഡീൽ ആർഎസ്എസ് നേതൃത്വവുമായി നടത്തുകയായിരുന്നു എഡിജിപിയുടെ രാഷ്ട്രീയ ദൗത്യമെന്നും സുധാകരൻ ആരോപിച്ചു.
ക്രമസമാധാന ചുമതല വഹിക്കുന്ന എഡിജിപി ഔദ്യോഗിക വാഹനം ഉപേക്ഷിച്ച് ആർഎസ്എസ് പോഷകസംഘടനാ നേതാക്കളോടൊപ്പം അവരുടെ വാഹനത്തിൽ ആർഎസ്എസ് ജനറൽ സെക്രട്ടറി ദത്തോത്രേയ ഹൊസബാളയെ കാണാൻ പോയത് ഈ സംഭവത്തിന്റെ ഗൗരവം വർധിപ്പിക്കുന്നതായി സുധാകരൻ പറഞ്ഞു. എഡിജിപിയുടെ രഹസ്യ ചർച്ചയ്ക്ക് മുഖ്യമന്ത്രിയുടെയും സിപിഎമ്മിന്റെയും അറിവും ആശിർവാദവുമുണ്ടെന്നും സംഘപരിവാർ രഹസ്യബന്ധത്തിലൂടെ ന്യൂനപക്ഷങ്ങളെ സിപിഐഎമ്മും മുഖ്യമന്ത്രിയും ചേർന്ന് വഞ്ചിച്ചെന്നും അദ്ദേഹം കുറ്റപ്പെടുത്തി.
Story Highlights: KPCC President K Sudhakaran accuses ADGP MR Ajith Kumar of being an agent for CM and CPI(M), alleges secret RSS ties
