Intelsat 33E Satellite Explosion Adds to Space Debris Concerns

ബഹിരാകാശ മാലിന്യത്തിൽ പുതിയ വർധനവുണ്ടായിരിക്കുകയാണ്. ഇന്റൽസാറ്റ് 33 ഇ എന്ന ഉപഗ്രഹം 35000 കിലോമീറ്റർ ഉയരത്തിൽ നിന്ന് ബഹിരാകാശത്തു പൊട്ടിത്തെറിച്ചതാണ് ഇതിന് കാരണം. ഭൂസ്ഥിര ഭ്രമണപഥത്തിൽ സ്ഥിതി ചെയ്യുന്ന ഈ ഉപഗ്രഹം ഏകദേശം 20 കഷ്ണങ്ങളായിട്ടാണ് പൊട്ടിത്തെറിച്ചതെന്ന് യുഎസ് സ്പെയ്സ് ഫോഴ്സ് അറിയിച്ചു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

എന്നാൽ എന്തുകൊണ്ടാണ് ഇത് സംഭവിച്ചതെന്നതിൽ ഇതുവരെ സ്ഥിരീകരണമുണ്ടായിട്ടില്ല. 2016-ൽ വിക്ഷേപിച്ച ഈ ബോയിങ് നിർമിത ഉപഗ്രഹം 2017-ൽ ഭ്രമണപഥത്തിലെത്തിയിരുന്നു. ബഹിരാകാശ മാലിന്യം ഭൂമിയുടെ പരിസ്ഥിതിയെയും അന്തരീക്ഷത്തെയും ബാധിക്കുന്ന ഒരു പ്രധാന പ്രശ്നമായി മാറിക്കൊണ്ടിരിക്കുകയാണ്.

ഇപ്പോഴുള്ള ബഹിരാകാശ മാലിന്യത്തിന്റെ കൂട്ടത്തിൽ 4300 ടൺ കൂടി ഇതോടെ വന്നിരിക്കുകയാണെന്ന് വിദഗ്ധർ അറിയിച്ചു. ഭാവി ബഹിരാകാശ പര്യവേക്ഷണങ്ങൾക്കും പദ്ധതികൾക്കും ഇത് വലിയ പ്രശ്നം സൃഷ്ടിക്കാം. ഭൂമിയുടെ അന്തരീക്ഷത്തിലേക്കു കയറുന്ന ബഹിരാകാശ മാലിന്യങ്ങളിൽ നല്ലൊരു പങ്കും അന്തരീക്ഷത്തിൽ തന്നെ കത്തിത്തീരാറാണെങ്കിലും, ചിലപ്പോൾ ഇവ ഭൂമിയിലും സമുദ്രങ്ങളിലും പതിക്കാറുണ്ട്.

ബഹിരാകാശ മാലിന്യം നീക്കം ചെയ്യുക എന്നത് നാസയും ഇസ്റോയും ഉൾപ്പെടെയുള്ള പ്രമുഖ ബഹിരാകാശ ഏജൻസികളുടെ മുന്നിലെ വലിയൊരു വെല്ലുവിളിയാണ്. ലേസറുകളും മറ്റു ഉപഗ്രഹങ്ങളും ഉപയോഗിച്ച് ബഹിരാകാശ മാലിന്യം നീക്കുന്നതിനുള്ള പദ്ധതികൾ നാസ ആവിഷ്കരിച്ചിട്ടുണ്ട്. ഫോട്ടോൺ പ്രഷർ, അബ്ലേഷൻ എന്നീ രണ്ടുതരം ലേസർ രീതികൾ പരീക്ഷിക്കാനാണ് നാസയുടെ ഉദ്ദേശം.

ഏറ്റവും മികച്ച നിരീക്ഷണ സംവിധാനം അമേരിക്കൻ വ്യോമസേനയുടെ ബഹിരാകാശ പ്രവർത്തന കേന്ദ്രത്തിന്റേതാണ്. ഏതെങ്കിലും ഒരു മാലിന്യം ഉപഗ്രഹങ്ങളുമായി കൂട്ടിയിടിക്കാൻ സാധ്യതയുണ്ടെന്നു കണ്ടെത്തിയാൽ ഉപഗ്രഹം നിയന്ത്രിക്കുന്നവരെ അവർ വിവരമറിയിക്കും.

Story Highlights: Intelsat 33E satellite explosion in orbit adds to space debris, raising concerns about future space missions and environmental impact

ആക്സിയം – 4 ദൗത്യം ജൂൺ 25-ന് വിക്ഷേപിക്കും; ശുഭാൻഷു ശുക്ലയും യാത്രയിൽ