ഇന്ത്യയും റഷ്യയും സംയുക്തമായി നിർമ്മിക്കുന്ന കലാഷ്നികോവ് എകെ 203 അസോൾട്ട് റൈഫിൾസിന് വൻ വിൽപ്പനയാണ് ഇപ്പോൾ ലഭിക്കുന്നത്. ഇന്തോ റഷ്യൻ റൈഫിൾസ് പ്രൈവറ്റ് ലിമിറ്റഡ് (ഐ.ആർ.ആർ.പി.എൽ) എന്ന സ്ഥാപനം വഴിയാണ് ഈ തോക്കുകൾ നിർമ്മിക്കുന്നത്. ആഫ്രിക്കയിൽ നിന്നും മധ്യ പൂർവേഷ്യയിൽ നിന്നുമാണ് കൂടുതൽ ഓർഡറുകൾ എത്തുന്നത്. റഷ്യക്ക് മേൽ അമേരിക്ക ഉപരോധം ഏർപ്പെടുത്തിയതോടെയാണ് ഐ.ആർ.ആർ.പി.എല്ലിന് വലിയ നേട്ടമുണ്ടായത്.
കലാഷ്നികോവ് തോക്കുകളുടെ ഏറ്റവും ആധുനിക രൂപമാണ് എകെ 203. റഷ്യക്ക് പുറത്ത് എകെ-200 സീരീസ് തോക്കുകൾ നിർമ്മിക്കുന്ന ആദ്യ രാജ്യമാണ് ഇന്ത്യ. റഷ്യയിൽ നിന്ന് ആയുധങ്ങൾ വാങ്ങിക്കൊണ്ടിരുന്ന രാജ്യങ്ങളിൽ നിന്നാണ് ഇപ്പോൾ ഇന്ത്യയിലേക്ക് തോക്കുകൾക്കായി ആളുകൾ എത്തുന്നത്. റഷ്യൻ സഹകരണം ഉള്ളതിനാൽ തോക്കുകളുടെ വിശ്വാസ്യത വർധിച്ചിട്ടുണ്ട്.
ഇതുവരെ 35,000 എകെ 203 തോക്കുകൾ ഇന്ത്യൻ സൈന്യം വാങ്ങിയിട്ടുണ്ട്. കൂടുതൽ തോക്കുകൾ ഉടൻ തന്നെ ഇന്ത്യൻ സൈന്യത്തിന് നൽകും. എന്നാൽ കമ്പനിയുമായി ആരും ഔദ്യോഗിക കരാറുകളിൽ ഏർപ്പെട്ടിട്ടില്ല. ഇന്ത്യൻ നിർമ്മിത എകെ 203 തോക്കുകൾക്ക് ആഗോള തലത്തിൽ വലിയ ആവശ്യകത ഉണ്ടാകുമെന്നാണ് പ്രതീക്ഷിക്കുന്നത്.
Story Highlights: Indian-made AK-203 rifles draw increased interest from Africa, Middle East
