ഇന്ത്യ-ചൈന അതിർത്തിയിലെ സൈനിക പിന്മാറ്റം പൂർത്തിയായതായി പ്രതിരോധവൃത്തങ്ങൾ അറിയിച്ചു. ഡെപ്സാങ്ങിലും ഡെംചോക്കിലുമാണ് സൈനിക പിന്മാറ്റം നടത്തിയത്. സൈന്യം നിർമിച്ച ടെന്റുകൾ ഉൾപ്പെടെയുള്ള അടിസ്ഥാന സൗകര്യങ്ങളും നീക്കിയതായാണ് വിവരം. ഇരു രാജ്യങ്ങളിലെയും ഉന്നത സൈനിക ഉദ്യോഗസ്ഥർ മേഖല സന്ദർശിച്ച് സാഹചര്യം വിലയിരുത്തി.
സൈനിക പിന്മാറ്റം സ്ഥിരീകരിച്ചതിനു ശേഷം നാളെ പട്രോളിങ് പുനഃരാരംഭിക്കാനാണ് നീക്കം. 2020 ഗൽവാൻ സംഘർഷത്തിനു ശേഷം ഇതാദ്യമായാണ് മേഖലയിൽ ഇരു സൈന്യവും പട്രോളിങ് പുനഃരാരംഭിക്കാൻ ഒരുങ്ങുന്നത്. ഇരു രാജ്യങ്ങളും തമ്മിൽ നാല് വർഷമായി തുടരുന്ന നയതന്ത്ര, സൈനിക ഭിന്നതകൾക്ക് അവസാനം കുറിക്കുന്നതുമായി ബന്ധപ്പെട്ട ഒത്തുതീർപ്പ് കരാറിൽ കഴിഞ്ഞയാഴ്ച നടന്ന ബ്രിക്സ് ഉച്ചകോടിയിലാണ് ധാരണയായത്.
2020 മെയ്-ജൂൺ മാസങ്ങളിൽ ഗാൽവാനിൽ നടന്ന സൈനിക ഏറ്റുമുട്ടലിന് ശേഷമാണ് ഇരു രാജ്യങ്ങൾക്കും ഇടയിലെ ബന്ധം വഷളായത്. ഇപ്പോൾ നടന്ന സൈനിക പിന്മാറ്റവും പട്രോളിങ് പുനഃരാരംഭിക്കാനുള്ള നീക്കവും ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്താനുള്ള ശ്രമങ്ങളുടെ ഭാഗമാണ്.
Story Highlights: India and China complete military disengagement at border, set to resume patrolling
