IC Balakrishnan MLA Denies Hiding, Assures Return Amidst Allegations

വയനാട് ഡിസിസി ട്രഷറർ എൻ എം വിജയന്റെയും മകന്റെയും ആത്മഹത്യയുമായി ബന്ധപ്പെട്ട് തനിക്കെതിരെ ഉയർന്നുവന്ന ആരോപണങ്ങൾക്കിടെ ഒളിവിൽ പോയി എന്ന പ്രചാരണം തെറ്റാണെന്ന് ഐ സി ബാലകൃഷ്ണൻ എംഎൽഎ വ്യക്തമാക്കി. വ്യക്തിപരമായ ആവശ്യങ്ങൾക്കായി കർണാടകയിലാണെന്നും ഉടൻ തന്നെ വയനാട്ടിൽ തിരിച്ചെത്തുമെന്നും അദ്ദേഹം ഒരു വീഡിയോ സന്ദേശത്തിലൂടെ അറിയിച്ചു. സിപിഎമ്മിന് തന്നോടുള്ള ഭയം മൂലമാണ് ഭരണ സ്വാധീനം ഉപയോഗിച്ച് കള്ളക്കേസിൽ കുടുക്കാൻ ശ്രമിക്കുന്നതെന്നും അദ്ദേഹം ആരോപിച്ചു. നീതിന്യായ വ്യവസ്ഥയിൽ പൂർണ്ണ വിശ്വാസമുണ്ടെന്നും നീതി ലഭിക്കുമെന്ന കാര്യത്തിൽ സംശയമില്ലെന്നും ഐ സി ബാലകൃഷ്ണൻ പറഞ്ഞു. സുഹൃത്തിന്റെ മകളുടെ വിവാഹത്തിനായാണ് ബാംഗ്ലൂരിൽ പോയതെന്നും ജനപ്രതിനിധി എന്ന നിലയിൽ ഒളിച്ചോടേണ്ട ആവശ്യമില്ലെന്നും അദ്ദേഹം വ്യക്തമാക്കി. തന്റെ ജനകീയതയെ സിപിഎം ഭയപ്പെടുന്നുവെന്നും അദ്ദേഹം കൂട്ടിച്ചേർത്തു. 2021ൽ ഐ സി ബാലകൃഷ്ണൻ ഡിസിസി അധ്യക്ഷനായിരിക്കെ ബത്തേരി അർബൻ ബാങ്കിലേക്ക് സ്വീപ്പർ തസ്തികയിൽ പാർട്ടി പ്രവർത്തകന്റെ മകൾക്ക് പ്രവേശനം നൽകണമെന്നാവശ്യപ്പെട്ട് നൽകിയ ശുപാർശ കത്ത് വിവാദമായിരുന്നു. ഈ നിയമനത്തോടെയാണ് എൻ എം വിജയന്റെ മകൻ ജിജേഷിന് അർബൻ ബാങ്കിലുണ്ടായിരുന്ന ജോലി നഷ്ടപ്പെട്ടതെന്നാണ് സിപിഐഎം ആരോപണം. ഇതിന് പിന്നിൽ കോഴ ഇടപാടാണെന്ന് ആരോപിച്ച് സിപിഐഎം ജില്ലാ കമ്മിറ്റിയംഗം സുരേഷ് താളൂർ പൊലീസിൽ പരാതി നൽകിയിട്ടുണ്ട്. ആത്മഹത്യ പ്രേരണാ കുറ്റം ചുമത്തിയതിനെ തുടർന്ന് ഐ സി ബാലകൃഷ്ണൻ, എൻ ഡി അപ്പച്ചൻ, കെ കെ ഗോപിനാഥൻ എന്നിവർ മുൻകൂർ ജാമ്യാപേക്ഷ സമർപ്പിച്ചിരുന്നു. കൽപ്പറ്റ പ്രിൻസിപ്പൽ സെഷൻസ് കോടതി പതിനഞ്ചാം തീയതി വരെ അറസ്റ്റ് പാടില്ലെന്ന് പൊലീസിന് വാക്കാൽ നിർദ്ദേശം നൽകി. ഐ സി ബാലകൃഷ്ണന്റെയും എൻ ഡി അപ്പച്ചന്റെയും ഫോൺ സ്വിച്ച്ഡ് ഓഫ് ആയതോടെ ഇവർ ഒളിവിൽ പോയതായുള്ള അഭ്യൂഹം ശക്തമായിരുന്നു. രണ്ട് ദിവസത്തിനുള്ളിൽ നാട്ടിലെത്തുമെന്ന് ഐ സി ബാലകൃഷ്ണൻ വ്യക്തമാക്കിയിട്ടുണ്ട്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

വയനാട്ടിലെ ഉരുൾപൊട്ടൽ ദുരിതബാധിതർക്ക് മുസ്ലിം ലീഗിന്റെ ഭവന സമുച്ചയം