ഹിമാചൽ പ്രദേശിലെ മാണ്ടിയിൽ മുസ്ലിം പള്ളിയിൽ അനധികൃത നിർമ്മാണം നടന്നുവെന്ന ആരോപണത്തെ തുടർന്ന് ഹിന്ദു സംഘടനകൾ പ്രതിഷേധവുമായി രംഗത്തെത്തി. മാണ്ടിയിലെ ജയിൽ റോഡ് ഏരിയയിലെ സഞ്ജോലി മുസ്ലിം പള്ളിയുടെ മതിൽ നിർമ്മാണവുമായി ബന്ധപ്പെട്ടായിരുന്നു സംഭവം. പ്രതിഷേധം മാണ്ടിയിലും ഷിംലയിലും അക്രമാസക്തമായി മാറി.
പൊതു മരാമത്ത് വകുപ്പിൻ്റെ സ്ഥലത്തായിരുന്നു നിർമ്മാണം നടന്നത്. പിഡബ്ല്യുഡിയും മുനിസിപ്പൽ കോർപറേഷനും പള്ളി കമ്മിറ്റിക്ക് നോട്ടീസ് നൽകിയിരുന്നു. വിവാദത്തിന് പിന്നാലെ അനധികൃത നിർമ്മാണം എന്ന് ആരോപിക്കപ്പെടുന്ന ഭാഗം പൊളിച്ചുനീക്കിയതായി പള്ളി ഭാരവാഹികൾ അറിയിച്ചു. നോട്ടീസ് ലഭിച്ച ഉടൻ തന്നെ മതിൽ പൊളിച്ചുനീക്കിയെന്ന് പള്ളി കമ്മിറ്റി ഭാരവാഹികളിൽ ഒരാൾ വാർത്താ ഏജൻസിയായ എഎൻഐയോട് പ്രതികരിച്ചു.
എന്നാൽ ഹിന്ദു സംഘടനകളിൽ ചിലർ ശക്തമായ പ്രതിഷേധവുമായി രംഗത്തെത്തിയതോടെ പ്രദേശത്ത് കനത്ത സുരക്ഷയൊരുക്കി. ഷിംലയിലും മാണ്ടി സിറ്റിയിലും പ്രതിഷേധവും സംഘർഷവുമുണ്ടായി. സ്ഥിതിഗതികൾ നിയന്ത്രണവിധേയമാക്കുന്നതിനായി 300 ഓളം പൊലീസുകാരെ പ്രദേശത്ത് വിന്യസിച്ചിട്ടുണ്ട്. സംഘർഷം വർദ്ധിക്കുന്ന സാഹചര്യത്തിൽ സുരക്ഷാ സംവിധാനങ്ങൾ കൂടുതൽ ശക്തമാക്കിയിട്ടുണ്ട്.
Story Highlights: Hindu groups protest against alleged illegal construction at Muslim mosque in Mandi, Himachal Pradesh
